सिंगापुरलाई हराउँदै नेपाल एसीसी यू-१६ इस्ट जोनको फाइनलमा

काठमाडौं, १८ असार । नेपाल एसीसी यू-१६ इस्ट जोन कप क्रिकेटको फाइनलमा प्रवेश गरेको छ । 

सोमबार मलेसियाको बायोमास ओभल क्रिकेट मैदानमा भएको खेलमा सिंगापुरलाई ९७ रनले हराउँदै नेपालले फाइनलमा प्रवेश गरेको हो ।

नेपालले जितका लागि दिएको १८५ रनको लक्ष्य पछ्याएको सिंगापुर ३१.३ ओभरमा ८७ रनमा अलआउट भयो ।  

यसअघि टस जितेर पहिला ब्याटिङ गरेको नेपालले निर्धारित ३५ ओभरमा ९ विकेट गुमाउँदै १८४ रन बनाएको थियो । 

नेपालले अब मंगलबार हुने फाइनलमा घरेलु टोली मलेसियासँग खेल्नेछ ।