लगातार दोस्रो जित हासिल गर्दै पुलिस शीर्ष स्थानमा

काठमाडौं । नेपाल पुलिस क्लबले ललित स्मृति एन्फा यु–१८ युथ लिगमा लगातार दोस्रो हासिल गरेको छ। 

सातदोबाटोस्थित एन्फा कम्प्लेक्समा बिहीबार सम्पन्न दिनको दोस्रो खेलमा पुलिसले संकटा क्लबलाई २-० गोलले पराजित गरेको हो।

पुलिसको जितमा दुवै गोल रञ्जित लामाले गरे। यो जितसँगै दुई खेलमा ६ अंक जोडेको पुलिस शीर्ष स्थानमा उक्लिएको छ। दुवै खेलमा पराजित संकटा अंकविहिन छ। 

पहिलो खेलमा पुलिसले थ्री स्टार क्लबलाई ७–२ गोल अन्तरले पराजित गरेको थियो भने संकटा मनाङ मर्स्याङदी क्लबसँग १-० ले पराजित भएको थियो।

पहिलो हाफ गोलरहित बराबरीमा सकिएको खेलको ७७औँ मिनेटमा रञ्जितले गोल गर्दै पुलिसलाई सुरुआती अग्रता दिलाए। त्यसको तीन मिनेटपछि नै पुन: व्यक्तिगत दोस्रो गोल गर्दै रञ्जितले पुलिसलाई २-० को जित दिलाए।