लेभान्टे र सेभियाको नाटकीय बराबरी

स्पेनी ला लिगामा लेभान्टे र सेभियाले सोमबार नाटकीय ३–३ को बराबरी खेलेका छन् । दोस्रो हाफको इन्ज्युरी समयमा तीन गोल भएपछि दुवै टिमले एक एक अंक हात पारे । निर्धारित समयको खेल सकिन अगाडिसम्म सेभिया २–१ ले अगाडि थियो ।

लेभान्टेका लागि एडरिन डे ला फुन्टे र इफेन्यी एनडुक्वेले गोल गरेपछि घरेलु टिम ३–२ ले अगाडि रहेको थियो । यस्तोमा सेभियाका लागि इसाक रोमेरोले इन्ज्युरी समयको दसौं मिनेटमा गोल गरे । त्यस लगतै उनी रातो कार्ड खाएर मैदान छाड्न पनि बाध्य रहे ।

यो नतिजापछि सेभिया १४ अंकमा पाँचौं स्थानमा रह्यो । लेभान्टे भने छ अंकमा १७ औं स्थानमा छ ।