जनकपुरको दोस्रो जित पोखराको दोस्रो हार

जनकपुर बोल्ट्सले नेपाल प्रिमियर लिग (एनपीएल) तेस्रो सिजन आइतबार आफ्नो दोस्रो जित आत्मसात् गरेको छ । टीयू क्रिकेट मैदानमा जनकपुरले पोखरा एभेन्जर्सलाई नौ रनले हराएको हो । पोखराको भने लगातार दोस्रो हार हो ।

जितका लागि १ सय ४८ रन पछ्याएको पोखराले २० ओभरमा नौ विकेट गुमाएर १ सय ३८ रन बनायो । त्यसमा कप्तान कुशल भुर्तेलले २४ बलमा ३५ रन बनाए । यस्तै विपिन आचार्यले २० र विपिन खत्रीले १७ रन थपे ।

पोखरालाई अन्तिम ओभरमा १७ रन चाहिएको थियो, त्यसलाई प्राप्त गर्न सकेन् । टस हारेर पहिले ब्याटिङको निम्तो पाएको जनकपुरले तृतराज दासको अर्धशतकको मदतले सात विकेटमा १ सय ४७ रन बनाएको थियो ।

उनले ५५ बलमा ६१ रन बनाए । उनको ब्याटबाट सात चौका र दुई छक्का निस्केको थियो । यस्तै अभिषेक तिवारीले २४ र मोइन अलिले २१ रन बनाए । पोखरेली बलरमध्ये साकिब अल हसनले १५ रनमा तीन विकेट लिए ।