भिल्लाको सामना गर्न अगाडि पीएसजी भन्छ, सबथोक जित्ने उद्देश्य

पेरिस सेन्ट जर्मेन (पीएसजी) ले आज बुधबार राति हुने यूईएफए सुपरकप फाइनलको खेलमा एस्टन भिल्लाको सामना गर्दैछ र त्यस अगाडि प्रशिक्षक लुइस एनरिकले भनेका छन्, आफ्नो क्लबको उद्देश्य रहेको छ, सबथोक जित्ने । गत सिजन फ्रान्सेली क्लबका लागि उत्कृष्ट रह्यो र यसक्रममा उसले लगातार दोस्रो पल्ट युरोपेली च्याम्पियन्स लिग जितेको थियो ।

यस्तै पीएसजीले यूईएफए सुपरकप मात्र होइन्, लगातार पाँचौं पल्ट लिग वान, फ्रेन्च च्याम्पियन्स ट्रफि र फिफा इन्टर कन्टिनेन्टलकप पनि जितेको थियो । यसपल्टको नयाँ सिजनका सुरुआत भने उसले यूईएफए सुपरकपसँगै गर्दैछ । खेल अस्ट्रियाको साल्सबर्गमा हुनेछ र मध्यरात पौने १ बजे सुरु हुनेछ ।

त्यस खेल अगाडि मिडियाको सामना गर्दै प्रशिक्षक एनरिकले भनेका छन्, ‘हामीले अबको खेलमा हाम्रो कुन स्तरको टिम हौ, त्यो मैदानमा खेलेर देखाउनु छ । हामी यो सिजन पनि सबथोक जित्न चाहन्छौं । इतिहास भन्छ, फुटबलमा जहिले पनि सबथोक जित्न सकिन्न । तर पनि हाम्रो उद्देश्य यस्तै ठूलो रहनेछ ।’

गत सिजन पीएसजीले टोटनहमलाई हराएर यूईएफएक सुपरकप जितेको थियो । यस्तै २०२४/२०२५ को च्याम्पियन्स लिगको क्वाटरफाइनलमै पनि पीएसजीले भिल्लालाई हराएको थियो । भिल्लाका प्रशिक्षक उनइ एमरीले खेल अगाडि मिडियासँगको कुराकानीमा पीएसजी नै जितका लागि बलियो प्रत्यासी रहेको बताएका छन् ।

उनले भनेका छन्, ‘पीएसजी धेरै अर्थमा जितका लागि बलियो देखिन्छ । तर हामीले पनि यो खेलका लागि राम्रो तयारी नै गरेका छौं ।’ सन् १९८२ यता पहिलो पटक भिल्ला यूईएफए सुपर लिगको फाइनल खेल्दैछ । पीएसजीले च्याम्पियन्स लिग र भिल्लाले युरोपा लिग विजेताका रूपमा यो खेल खेल्न लागेको हो ।