मलेसियासँग पराजित नेपालले हङकङसँग फाइनल खेल्ने

चारदेशीय महिला टी-ट्वान्टी सिरिजको फाइनलमा नेपाल र हङकङ खेल्ने भएको छ।

समूह चरणको अन्तिम खेलमा नेपाललाई ६ विकेटले पराजित गरेपनि आयोजक मलेसिया नेट रनरेटमा पछि पर्दै फाइनलमा पुग्न सकेन।

नेपाल, हङकङ र मलेसियाले ३ मध्ये समान २-२ खेलमा जित हात पार्दै ४-४ अंक जोडेको थियो।

तर नेट रनरेटमा नेपाल र हङकङ फाइनलमा प्रवेश गरेका हुन् । कुवेतले भने ३ वटै खेलमा पराजय भोग्यो।

नेपालले दिएको ८५ रनको लक्ष्य मलेसियाले १६ ओभर २ बलमा ४ विकेट गुमाएर पूरा गर्‍यो।

नेपालका लागि पुजा महतो, सीता राना मगर र कप्तान रुविना क्षेत्रीले १-१ विकेट हात पारे।

नेपालका लागि कप्तान रुविना क्षेत्रीले २३ रन तथा इन्दु वर्माले २० रन जोडे। काजल श्रेष्ठले १८ रन बनाइन्।