वेस्ट ह्याम जितेपछि टोटनहमलाई दबाब

वेस्ट ह्यामले इंग्लिस प्रिमियर लिगमा शुक्रबार उल्भ्समाथि ४–० को शानदार जित निकालेको छ । यो जितपछि उसले रेलिगेसन क्षेत्र छाडेको छ । यो नतिजापछि टोटनहम भने १८ औं स्थानमा झरेको छ र दबाबमा आएको छ । वेस्ट ह्यामका लागि कोन्सटान्टिनोस काभ्रोपानोस र भ्यालेन्टिन कासटेलानोसले दुई दुई गोल गरे ।

यो जितपछि ३२ खेलबाट वेस्ट ह्यामको ३२ अंक भएको छ । एक खेल कम खेलेको टोटनहम भने ३० अंकमा रह्यो । उल्भ्स भने १७ अंकमा सीमित रहेर सबैभन्दा अन्तिम स्थानमा छ । यो सिजन उसको रेलिगेसन तय जस्तै छ ।

टोटनहम सन् २०१५ यता पहिलो पटक रेलिगेनस क्षेत्रमा पुगेको हो । अब आइतबार हुने खेलमा टोटनहमले सन्डरल्यान्डको सामना गर्नेछ र यो खेल जितेमा फेरि माथि उक्लने अवसर हुनेछ ।