रोड टु युएफसी’ सिजन–५ को बान्टमवेट फाइनल खेल अष्ट्रेलियामा हुने मिति घोषणा

काठमाडौँ — नेपाली मिक्स मार्सल आर्ट्स (एमएमए) खेलाडी रवीन्द्र ढाँट ‘रोड टु युएफसी’ सिजन–५ को बान्टमवेट फाइनलमा जापानका र्यो ताजिमासँग भिड्ने भएका छन्। यो खेल आगामी फेब्रुअरी ७, २०२७ मा अस्ट्रेलियाको सिड्नीस्थित अफ्टरपे एरिनामा हुने तय भएको छ।

यो फाइनल जित्ने खेलाडीले प्रतिष्ठित युएफसी संस्थासँग व्यावसायिक सम्झौता गर्ने अवसर पाउनेछन्। ढाँटले यो खेल जितेमा युएफीसँग सम्झौता गर्ने पहिलो नेपाली खेलाडी बन्नेछन्।

‘बझाङी बाघ’ उपनामले परिचित ढाँटले सेमिफाइनलमा न्युजिल्यान्डका कासिब मर्डकलाई स्प्लिट डिसिजनमा पराजित गर्दै फाइनलमा स्थान बनाएका थिए। उनी रोड टु युएफसीको फाइनलमा पुग्ने पहिलो नेपाली एमएमए फाइटर बनेका छन्। ढाँटको व्यावसायिक रेकर्ड ११–१ रहेको छ र उनले ११ जितमध्ये ९ खेल डिस्टेन्सभन्दा अगाडि (नकआउट वा सबमिशन) जितेका छन्।

जापानका ताजिमाको व्यावसायिक रेकर्ड १२–३ रहेको छ। उनले सेमिफाइनलमा भारतका चुनरेङ कोरेनलाई सर्वसम्मत निर्णयमा हराएका थिए। ताजिमासँग ढाँटभन्दा ५ सेन्टिमिटर बढी रिच (१८० सेन्टिमिटर) रहेको छ र उनी ‘टेक्निकल तथा अनुभवी’ खेलाडीका रूपमा चिनिन्छन्।

यो खेल नेपाली खेलकुदका लागि ऐतिहासिक अवसर हो, किनकि ढाँटको जितले नेपाललाई युएफीजस्तो विश्वव्यापी मञ्चमा प्रतिनिधित्व गर्ने बाटो खोल्नेछ।