युनाइटेडमाथि ब्रेन्टफोर्डको जित

ब्रेन्टफोर्डले इंग्लिस प्रिमियर लिगमा शनिबार म्यानचेस्टर युनाइटेडमाथि ३–१ को त्यस्तो प्रभावशाली जित रचेको छ, जसले लन्डन क्लबको आत्मविश्वास अझ बढाउने छ । कम्युनिटी स्टेडियममा भएको खेलमा ब्रेन्टफोर्डका लागि इगोर थिएगोले दुई गोल गरे ।

उनले आठौं र २० औं मिनेटमा गोल गरे । युनाइटेडका लागि बेन्जामिन सेस्कोले २६ औं मिनेटमा एक गोल फर्काए । युनाइटेडका लागि कप्तान ब्रुनो फर्नान्डेज ७६ औं मिनेटमा पेनाल्टीबाट गोल गर्न चुके । उनको फितलो प्रहारलाई ब्रेन्टफोर्डका गोलरक्षक क्वेभिन केलहरले जोगाए ।

त्यसको फाइदा उठाउँदै ब्रेन्टफोर्डले दोस्रो हाफको इन्ज्युरी समयको पाँचौं मिनेटमा तेस्रो गोल थप्यो र त्यो म्याथिस जेन्सनको नाममा रह्यो । यो हारपछि युनाइटेड र उसका प्रशिक्षक रुबेन एमोरिम अझ धेरै दबाबमा आएका छन् । यो नतिजापछि ब्रेन्टफोर्डको सात अंक भएको छ भने युनाइटेड सात अंकमै सीमित रह्यो ।