हाइडेनहाइममाथि बायर्नको जित

बायर्न म्युनिखले आफ्नो अन्तिम प्रि-सिजन मैत्रीपूर्ण खेलमा दोस्रो श्रेणीको क्लब एफसी हाइडेनहाइमलाई ४–२ गोल अन्तरले पराजित गरेको छ। तर, यो जितभन्दा पनि युवा स्टार जामाल मुसियालाको मैदानमै बेहोस भई ढल्नुले बायर्न शिविरमा ठूलो चिन्ता पैदा गरेको छ।

हाइडेनहाइमले पहिलो हाफमा दुई पटक अग्रता लिँदै बायर्नलाई चुनौती दियो। यानिक वाग्नरले ५औं मिनेटमा गोल गर्दै सुरुवाती अग्रता दिलाए, तर बायर्नका फेलिप चाभेजले २५औं मिनेटमा फ्रि-किकमा उत्कृष्ट गोल गर्दै खेल बराबरीमा ल्याए। पहिलो हाफको अन्त्यतिर जुलियन निहुसले गोल गर्दा हाइडेनहाइम २–१ ले अगाडि थियो।

तर, दोस्रो हाफमा बायर्नले पूर्ण नियन्त्रण लियो। ४७औं मिनेटमा अरिजोन इब्राहिमोभिचले पेनाल्टीमा गोल गर्दै खेल २–२ को बराबरीमा ल्याए। ७८औं मिनेटमा लुइस डियाजले माइकल ओलिसको पासमा गोल गर्दै बायर्नलाई पहिलो पटक अग्रता दिलाए, र ८३औं मिनेटमा नयाँ साइनिङ नाथानिएल ब्राउनले उत्कृष्ट व्यक्तिगत प्रदर्शन गर्दै खेलको अन्तिम रूपरेखा ४–२ मा तय गरे।

खेलको ६१औं मिनेटमा मैदान प्रवेश गरेका मुसियाला मात्र ८ मिनेटपछि नै बेहोस भई ढले। यसअघि लाइपजिगविरुद्धको खेलमा समेत उनी यसरी नै ढलेका थिए। प्रशिक्षक भिन्सेन्ट कम्पनीले उनलाई तुरुन्त मैदानबाहिर निकाले पनि, हालसम्म उनको स्वास्थ्य अवस्थाबारे केही खुलेको छैन।