पोखरालाई निराश पार्दै चितवन तेस्रो स्थानमा

चितवन राइनोजले नेपाल प्रिमियर लिग (एनपीएल) तेस्रो सिजनमा शुक्रबार पोखरा एजेन्जर्समाथि ३० रनको जित निकाल्दै तेस्रो स्थानमा उक्लेको छ । यो जितपछि चितवनको पाँच अंक भएको छ र तेस्रो स्थानमा उक्लेको छ । पोखराको भने यो लगातार चौथो हार हो ।

यस्तोमा पोखरा शून्य अंकमा पुछारमा छ । उसको प्ले अफ सम्भावना पनि लगभग समाप्त भएको छ । जितका लागि १ सय ५२ रन पछ्याएको पोखरा १९ ओभरमा १ सय २१ रन बनाएर अलआउट भएको हो । पोखराका लागि अर्जुन कुमाल ४४ बलमा ४५ रन बनाए र यो नै सबैभन्दा ठूलो व्यक्तिगत स्कोर रह्यो । चितवनका बलरमध्ये कमल ऐरीले र रिजन ढकालले तीन तीन विकेट हात पारे ।

त्यस अगाडि टस हारेर पहिले ब्याटिङ गरेको चितवनले २० ओभरमा छ विकेट गुमाएर १ सय ५१ रन बनाएको थियो । त्यसमा कप्तान सिकन्दर राजा र रवि बोपाराले पाँचौं विकेटका लागि ६० रनको साझेदारी गरे । त्यसमध्ये राजाले १६ बलमा ३७ बनाए भने बोपाराले २८ बलमा ३५ रन जोडे ।

सुरुमा अर्जुन साउदले डाविड मालनसँग पहिलो विकेटका लागि ६० रनको साझेदारी गरे । अर्जुनले २७ बलमा ३१ रन र मालनले २८ बलमा २८ रन बनाए । कुशल मल्लको ब्याटबाट ११ रन मात्र सम्भव भयो । पोखराका बलरमध्ये करुनारत्ने, विपिन खत्री र कुशल भुर्तेलले दुई दुई विकेट लिए ।