बंगलादेशी फुटबल टिम लिन सेनाको विशेष विमान

काठमाडौं– अन्ततः नेपालमा रहेको बंगलादेशी राष्ट्रिय फुटबल टिम बिहीबार ढाका फर्कने भएको छ । बंगलादेशी टिम र काठमाडौंमा रहेका बंगलादेशी पत्रकारलाई लिन त्यहाँको सेनाको विशेष विमान काठमाडौं आएको हो ।

अखिल नेपाल फुटबल संघ (एन्फा) का अनुसार बंगलादेशी सेनाको विमान ११ बजे ढाकातर्फ उड्ने छ । बंगलादेशी फुटबल टिम नेपालविरुद्ध दुई मैत्रीपूर्ण अन्तर्राष्ट्रिय खेल खेल्न काठमाडौं आएको थियो ।

त्यसमध्ये पहिलो खेल मात्र सम्भव भएको थियो र तयसको नतिजा गोलरहित बराबरी रहेको थियो । जेन–जीको प्रदर्शनका कारण मंगलबार हुनु पर्ने खेल भने एन्फाले रद्द गरिएको थियो ।

त्रिभुवन अन्तर्राष्ट्रिय विमान स्थल बन्द गरिएको हुनाले टिम र पत्रकार यहीं रोकिएका थिए । नेपाल र बंगलादेशबीचको खेलको समाचार संप्रेसन गर्न एक दर्जन भन्दा बढी पत्रकार नेपाल आएका थिए ।