एएफसी एसियन कप डिसेम्बरमा सर्यो

एसियाली फुटबल महासंघ (एएफसी) ले साउदी अरबमा आयोजना हुने २०२७ एएफसी एसियन कप स्थगित गरेको छ। सुरुमा सन् २०२७ को जनवरीमा हुने तय भएको प्रतियोगिता अब २०२७ डिसेम्बर २३ देखि २०२८ जनवरी २१ सम्म सञ्चालन हुने भएको छ।

एएफसीले क्षेत्रीय अवस्था, सुरक्षा तथा यात्रा–व्यवस्थापनमा देखिएका जटिलताका कारण प्रतियोगिता सार्नुपरेको जनाएको छ। नयाँ मितिलाई अन्तिम स्वीकृतिका लागि फिफामा पठाइएको छ।

२०२७ संस्करण साउदी अरबले पहिलो पटक आयोजना गर्दैछ। प्रतियोगिताका खेल रियाद, जेद्दा र अल खोबारका आठ रंगशालामा हुने योजना छ।

यो स्थगनले नेपाललगायत एसियाली राष्ट्रहरूको फुटबल क्यालेन्डरमा पनि प्रभाव पार्नेछ। नेपालको एसियन कप छनोट अभियान सकिए पनि महाद्वीपीय प्रतियोगिताको मिति सर्दा सम्बन्धित छनोट तथा युवा प्रतियोगिताको तालिकामा समेत असर पर्ने अपेक्षा गरिएको छ।