किंग्स कप भलिबलः पुलिस फाइनलमा

काठमाडौं । गण्डकी प्रदेशमाथि जित निकाल्दै विभागीय नेपाल पुलिस क्लब दोस्रो संस्करणको किंग्स कप पुरुष भलिबल प्रतियोगिताको फाइनलमा प्रवेश गरेको छ ।

काठमाडौंको नयाँ बसपार्कस्थित ढोरपाटन स्पोर्ट्स क्लबको कोर्टमा शुक्रबार भएको खेलमा पुलिसले गण्डकीलाई ३–१ को सेटमा पराजित गर्दै उपाधि नजिक पुगेको हो ।

पुलिसले पहिलो र दोस्रो सेटमा जित हात पारेर खेल आफ्नो पक्षमा रहेको संकेत गरेको थियो । तेस्रो सेट जितेर गन्डकीले खेलमा फर्कने संकेत गरेको थियो । तर, चौथो सेटमा जित हात पारेर पुलिसले फाइनल यात्रा पक्का गर्यो । 

पुलिसले पहिलो र दोस्रो सेट क्रमश २५–२३, २६–२४ जितेको थियो । तेस्रो सेट २५–२२ गुमाउँदा चौथो सेट २५–२१ ले आफ्नो पक्षमा पार्दै पुलिसले जित निकाल्न सफल भयो । 

शुक्रबार नै हुनुपर्ने आयोजक किंग्स क्लब काठमाडौं र विभागीय नेपाल एपिएफ क्लबबीचको दोस्रो सेमिफाइनल खेल निरन्तरको वर्षाका कारण स्थगित भएको छ । तेस्रो सेट चलिरहँदा वर्षा भएपछि खेल पुन सुचारु हुन सकेन ।

अब यो खेल शनिबार सुरुआतबाटै हुनेछ ।