Kathmandu Rayzrs

काठमाडौं। श्री भगवती क्लब सहिद स्मारक ‘ए’ डिभिजन लिगमा बढुवा भएको छ। सातदोबाटोस्थित एन्फा कम्प्लेक्स मैदानमा मंगलबार सम्पन्न खेलमा भगवतीले ब्वाइज युनियन क्लबलाई २–१ ले पराजित गरेको हो। भगवती शीर्ष डिभिजनमा उक्लिने दोस्रो क्लब हो। यसअघि नै प्लानिङ ब्वाइज शीर्ष डिभिजनमा उक्लिसकेको छ।&nbsp; भगवतीको जितमा शिशिर लेखी र अजित लामाले गोल गरे। ब्याइजका सञ्जीव लामाले गरेको गोल सान्त्वना रह्यो। खेलको छैटौं मिनेटमै शिशिरको गोलमार्फत भगवतीले सुरुआती अग्रता लिएको थियो। ३८औं मिनेटमा अजितले अर्को गोल थपे। ७९औं मिनेटमा सञ्जीवले गोल गर्दै ब्याइजलाई फर्काउने प्रयास गरे पनि सफल हुन सकेनन्। जितसँगै भगवतीले १२ खेलबाट २६ अंक पुर्‍यायो। ब्याइज भने दोस्रो डिभिजनमै रहने पक्का भएको छ। उसको समान खेलबाट १९ अंक छ।

श्री भगवती 'ए' डिभिजनमा बढुवा

काठमाडौं । भारतमा सम्पन्न (साफ) यु-१९ च्याम्पियनसिपमा सहभागिता जनाएर नेपाली युवा टोली नेपाल फर्किएको छ। त्रिभुवन अन्तर्राष्ट्रिय विमानस्थलमा मंगलबार टाेलीलाई अखिल नेपाल फुटबल संघ (एन्फा)का प्रवक्ता सुरेश शाहले स्वागत गरे। अरुणाञ्चलको गोल्डेन जुब्ली रंगशालामा सम्पन्न प्रतियोगिताकाे सेमिफाइनलमा नेपाल बंगलादेशसँग २-१ ले पराजित भएको थियो। नेपालले समूह चरणमा श्रीलंकालाई ५-० ले पराजित गरेको नेपालले भारतसँग ४-० को हार बेहोरेको थियो।

साफ खेलेर नेपाली टोली स्वदेश फर्कियो

काठमाडौं । नेपाल आइसिसी महिला टी-२० विश्वकप एसिया छनोटअन्तर्गत सुपर–३ को अन्तिम खेलमा घरेलु टोली थाइल्यान्डसँग पराजित भएको छ। बैंककको टेर्डथाइ क्रिकेट मैदानमा मंगलबार नेपाल ७८ रनले पराजित भएकाे हाे। थाइल्यान्डले प्रस्तुत गरेकाे १५९ रनको लक्ष्य पछ्याएको नेपालले २० ओभर नै ब्याटिङ गर्दै ९ विकेट गुमाउँदै ८० रन मात्रै बनाउन सक्यो। नेपालका लागि कवितार कुँवरले २४, रजाजमति ऐरीले अविजित २० र रुविना क्षेत्रीले १२ रन बनाउनुबाहेक अन्य ब्याटरले दोहोरो अंकमा रन जोड्न सकेनन्। थाइल्यान्डका लागि ओन्निचा कामचोम्फुले सर्वाधिक चार, थिपाचा पुथावोङले तीन र सुलेपोर्न लाओमीले एक विकेट हात पारे।&nbsp; त्यसअघि टस हारेर ब्याटिङको निम्तो पाएको थाइल्यान्डले निर्धारित २० ओभरमा दुई विकेट गुमाउँदै १५८ रनको योगाफल तयार पारेको थियो।

थाइल्यान्डसँग नेपाल पराजित

काठमाडौं। श्री कुमारी क्लब सहिद स्मारक बी डिभिजन लिगमा रेलिगेसनबाट जोगिएको छ। त्रिपुरेश्वरस्थित दशरथ रंगशालामा सोमबार सम्पन्न खेलमा सरस्वती युथ क्लबमाथि कुमारीले २–० ले पराजित गरेको हो।&nbsp;&nbsp;कुमारीको जितमा यमन महर्जन र मौसम राईले गोल गरे।खेलको ४४औं मिनेटमा यमनको गोलमार्फत कुमारीले सुरुआती अग्रता लिएको थियो। ९०औं मिनेटमा मौसमले गोल गर्दै कुमारीको सहज जित सुनिश्चित गरे। जितसँगै कुमारीले १२ खेलबाट १६ अंक पुर्‍याएको छ। सरस्वतीको समान खेलबाट १५ अंक छ।

सरस्वतीमाथि जित हासिल गर्दै श्री कुमारी रेलिगेसनबाट जोगियो

जेठ ५ काठमाण्डौ २१औं एकेएफ एशियन सिनियर कराते च्याम्पियनशिपमा नेपालबाट ११ जना खेलाडीले प्रतिष्पर्दा गर्ने भएका छन् । यही जेठ ९ देखि ११ गते (२०२५मे २३–२६) सम्म हुने च्याम्पियनशिपमा सहभागी &nbsp;हुने खेलाडीहरुलाई राष्ट्रिय खेलकुद परिषद्का सदस्य सचिव टंकलाल घिसिङले शुभकामना सहित &nbsp;विदाई गर्नुभयो । खेलाडी ः सोनिम मानन्धर, साजन मोक्तान, मीन बहादुर तामाङ, सन्तोष श्रेष्ठ, महमद सेखु आलम, तेन्जिङ शेर्पा, सानुमाया थिङ, अन्जली महर्जन, सविना श्रेष्ठ, निरुपा दोङ तामाङ, र एरिका गुरुङ हेड कोचः कुशल श्रेष्ठ, &nbsp;टिम कोचः मन्डेकाजी श्रेष्ठ, टिम म्यानेजरः किशोर प्रसाद भट्टराई

एशियन कराते च्याम्पियनशिपमा, ११ जना खेलाडी सहभागी हुदै

काठमाडौं। नेपालले एक खेलअगाबै पहिलो पटक आइसिसी महिला विश्वकपको ग्लोबल छनोटमा स्थान बनाएको छ। आइतबार सम्पन्न ‘सुपर थ्री’को पहिलो खेलमा नेपालले संयुक्त अरब इमिरेट्स (युएई)लाई पाँच विकेटले पराजित गरेको हो। योसँगै एसियाबाट थाइल्यान्ड र नेपाल ग्लोबल छनोटमा पुग्न सफल भएका हुन्। युएई भने बाहिरिएको छ।थाइल्यान्डको टेर्डथाइ क्रिकेट मैदानमा युएईले प्रस्तुत गरेको ११५ रनको लक्ष्य नेपालले तीन बल बाँकी हुँदा पाँच विकेट गुमाउँदै पूरा गर्यो। नेपालका लागि कप्तान इन्दु बर्माले अविजित ३०, रुविना क्षेत्रीले २३, सम्झना खड्काले २१ र पूजा महतोले १३ रन बनाए। युएईका लागि मिसेल बोथ, सुरक्षा कोटे, वैष्णभी महेश र कप्तान इशा ओजाले सामना एक विकेट लिए। त्यसअघि टस हारेर ब्याटिङको निम्तो पाएको युएईले निर्धारित २० ओभरमा सात विकेट गुमाउँदै ११४ रनको योगफल तयार पारेको थियो।युएईका लागि इशा ओजाले ३९, तीर्थ सतिशले २१, हिना होटचन्दनीले २० र लाभन्या केनीले १२ रन बनाए। नेपालका लागि मनिषा उपाध्यायले चार, कविता कुँवरले दुई तथा राजमति ऐरीले एक विकेट लिए।अब नेपालले मंगलबार अन्तिम खेल थाइल्यान्डसँग खेल्नेछ। उक्त खेल दुवै टोलीका लागि अभ्यास मात्रै हुनेछ। नेपालले पहिलोपल्ट ग्लोबल छनोटमा स्थान बनाएको हो। अब विश्वकप पुग्न अन्तिम चरणको छनोट खेल्नेछ। उक्त छनोटमा १० टिमले प्रतिस्पर्धा गर्नेछन्। शीर्ष ४ टोलीले विश्वकपमा स्थान बनाउने छन्।

नेपाल पहिलो पटक विश्वकपको ग्लोबल छनोटमा

काठमाडौं । स्पेनिस ला लिगा च्याम्पियन बार्सिलोना भिल्लारियलसँग ३–२ ले पराजित भएको छ। यसअघि नै च्याम्पियन बनिसकेको बार्सिलोना घरेलु मैदानमा अग्रता जोगाउन सकेन।&nbsp; भिल्ला रियल पहिलो हाफको धेरै समय दबाबमा रह्यो, तर दोस्रो हाफको पाँचौं मिनेटमा सान्ती कोमेसानाले येरेमी पिनोको उत्कृष्ट थ्रु बलमा दौडँदै आएर गोलकिपर मार्क–आन्द्रे टर स्टेगनलाई छलेर बराबरी गरे। परिवर्तित ताजोन बुकेननले ८० औं मिनेटमा निर्णायक गोल गरे। ३८ औं मिनेटमा यामालले आफ्नो ट्रेडमार्क शैलीमा नवौं लिग गोल गरे। फर्मिनले पहिलो हाफको इन्जुरी समयको पाँचौं मिनेटमा गोल गर्दै बार्सिलोनालाई अग्रता दिलाए। पुनरागमन जितसहित भिल्लारियल शीर्ष पाँचमा रहँदै आगामी सिजनको च्याम्पियन्स लिगको सुनिश्चितता गर्यो।

ला लगिा च्याम्पियन बार्सिलोना पराजित

काठमाडौं। घरेलु टोली भारतले बंगलादेशलाई पेनाल्टी सुटआउटमा पराजित गर्दै साफ यु–१९ च्याम्पियनसिपको उपाधि रक्षा गरेको हो। गोल्डेन जुबली स्टेडियममा आइतबार सम्पन्न खेलमा भारतले बंगलादेशलाई ४–३ ले पराजित गरेको हो। यसअघि भारतले सन् २०२३ मा पाकिस्तानलाई ३–२ ले पराजित गर्दै पहिलोपल्ट उपाधि जितेको थियो। निर्धारित समयको खेल १–१ को बराबरीमा सकिएको थियो। त्यसपछि उपाधिको छिनोफानो पेनाल्टी सुटआउटमार्फत गरिएको हो। पेनाल्टी सुटआउटमा भारतले बाँजी मार्यो।&nbsp; पेनाल्टी सुटआउटमा भारतका मोहम्मद अर्बाश, रोहेन सिंह, ऋषि सिंह, जोड्रिक अब्रान्चेस र सिंगमायुम शमीले गोल गरे। बंगलादेशका मिठु चौधरी, मुर्सेद अली र जोय अहमदले गोल गरे। नजमुल फैसलको प्रहार आकासिएको थियो। उद्दिन साहेदको प्रहार भारतीय गोलकिपर सुजर सिंहले रोके। खेलको दोस्रो मिनेटमै भारतले सुरुआती अग्रता लिएको थियो। सिंगमायुम शामीले प्रहार गरेको फ्रिकक बल सिधै गोलमा परिणत भएको थियो। तर, ६१औं मिनेटमा जोय अहमेदले बराबरी गोल फर्काए।

बंगलादेशलाई पराजित गर्दै भारतले रक्षा गर्‍यो उपाधि

काठमाडौँ। १० वर्षपछि साफ यु–१९ च्याम्पियनसिपको फाइनलमा पुग्ने लक्ष्य बोकेर भारत पुगेको नेपाली टोलीको यात्रामा बंगलादेश बाधक बनेको छ। भारतको अरुणाञ्चल प्रदेशस्थित गोल्डेन जुब्ली स्टेडियममा शुक्रबार सम्पन्न सेमिफाइनलमा बंगलादेशसँग नेपाल २–१ ले पराजित भएको हो। योसँगै बंगलादेशले पहिलोपल्ट यो उमेर समूहमा फाइनलमा आफ्नो स्थान सुनिश्चित गरेको छ। नेपाल भने अन्तिम चारबाटै घर फर्किने छ। बंगलादेशलाई जित दिलाउन आशहिकुर रहमान र कप्तान नजमुल हुडाले गोल गरे। ७२औं मिनेटमा हुडाको कर्नर बललाई अनमार्क रहेका रहमानले हेडरमार्फत सहजै गोल गरे। ८०औं मिनेटमा हुडाले अर्को गोल गर्दै अग्रता २–० मा पुर्‍याए। मोहम्मद मनिकले नेपालका डिफेन्डर मदन पौडेल र प्रशान्त मोक्तानलाई छक्याउँद दिएको बललाई उनले सहजै गोलमा परिणत गरे। ८७औं मिनेटमा सुजनले गोल गर्दै अग्रता २–१ मा ल्याए। सविनकुमार लुंगेलीको क्रसलाई उनले गोलमा परिणत गरेका हुन्। जारी प्रतियोगितामा उनको यो दोस्रो गोल हो।

नेपाल बंगलादेशसँग पराजित

काठमाडौं। नेपाल आइसिसी महिला टी–२० विश्वकप एसिया छनोटको सुपर थ्रीमा प्रवेश गरेको छ। शुक्रबार तय भएको हङकङ र बहराइनबीचको खेल वर्षाले रद्द भएपछि नेपाल सुपर थ्रीमा प्रवेश गरेको हो। नेपाल र हङकङको समान ५-५ अंक थियो। तर, नेपाल बढी जित निकालेका आधारमा दोस्रो चरणमा पुगेको हो।

नेपाल सुपर थ्रीमा

३१ बैशाख, काठमाडौं । हिमालयन जाभा बास्केटबल लिग (एचजेबीएल) अन्तर्गत बुधबार भएको खेलमा रोएल्स र गोल्डेनगेट बास्केटबल क्लब विजयी भएका छन् ।&nbsp; रोएल्सले टाइम्स बास्केटबल क्लबलाई हराएर लिगमा पहिलो पहिलो जित हात पारेको छ ।&nbsp;यसअघिका दुई खेलमा पराजित भएको रोएल्सले बुधबार टाइम्स क्लबलाई ८३-७१ ले पराजित गरेको हो ।&nbsp;पहिलो जितपछि रोएल्सले ३ खेलबाट ३ अंक जोडेको छ । दोस्रो हार व्यहोरेको टाइम्सको पनि ३ खेलबाट समान ३ अंक नै छ ।&nbsp;कीर्तिपुर कभर्डहलमा भएको खेलमा रोएल्सले पहिलो क्वाटरमा १९-१५ को अग्रता लिएको थियो । त्यसलाई कायम राख्दै रोएल्सले अन्त्यसम्म अग्रता लियो । रोएल्सले दोस्रो क्वाटर २०-१४ ले आफ्नो पक्षमा पार्दै हाफटाइमसम्म ३९-२९ को अग्रता बनाएको थियो ।रोएल्सले तेस्रो क्वाटर २०-१८ ले आफ्नो पक्षमा पारेको थियो । चौथो क्वाटरमा दुवै टिमले २४-२४ अंक स्कोर गरेका थिए ।&nbsp;विजयी टिम रोएल्सका लागि प्रसाङ ध्वज मास्केले सर्वाधिक २६ अंक स्कोर गरे । टाइम्सका लागि मनिष केसि र मबिन्द्र भण्डारीले समान १७ अंक स्कोर गरे । रोएल्सका विनोद महर्जन मोस्ट भ्यालुएबल प्लेअर घोषित भए ।&nbsp;यस्तै बुधबारै भएको दोस्रो खेलमा गोल्डेनगेटले कीर्तिपुर बास्केटबल क्लबलको अपराजित यात्रा टुङ्गयाउँदै दोस्रो जित हात पारेको छ ।&nbsp; गोल्डेनगेटले कीर्तिपुरलाई ९२-६५ ले पराजित गरेको हो । दोस्रो जितपछि गोल्डेनगेटले ३ खेलबाट ६ अंक जोडेको छ । पहिलो हार व्यहोरेको कीर्तिपुरको पनि ३ खेलबाट समान ६ अंक नै छ ।&nbsp;पहिलो क्वाटर गोल्डेनगेटले २९-२१ ले आफ्नो पक्षमा पारेको थियो । तर दोस्रो क्वाटरमा कीर्तिपुरले पुनरागमन गर्दै २४-१९ ले आफ्नो पक्षमा पारेपछि हाफटाइमसम्म गोल्डेनगेटले ४८-४५ को झिनो अग्रता बनाएको थियो ।&nbsp;तर तेस्रो र चौथो क्वाटर २१-९ र २३-११ ले आफ्नो पक्षमा पारेपछि गोल्डेनगेटले सहजै खेल जितेको हो ।&nbsp;गोल्डेनगेटका लागि अजय कुश्वाहाले सर्वाधिक २२ अंक जोडे । उनी खेलको मोस्ट भ्यालुएबल प्लेअर पनि घोषित भए । कीर्तिपुरमा लागि सयुन राईले १७ अंक स्कोर गरे ।

एचजेबीएलमा रोएल्स र गोल्डेनगेट विजयी

ललितपुर। दक्षिणकाली नगरपालिकालाई हराउँदै गाेदावरी नगरपालिका जारी उपत्यकाव्यापी अन्तरपालिका खुला गोदावरी मेयर कप फुटबलको फाइनलमा पुगेको छ। गोदावरी–१० टाहाखेलस्थित निर्माणाधीन गोदावरी बहुउद्देश्यीय रंगशालाको झ्यालुन्टार मैदानमा बुधबार सम्पन्न दाेस्राे सेमिफाइनलको खेलमा दक्षिणकालीलाई पेनाल्टी सुट आउटमा ४-३ गाेल अन्तरले हराउँदै गाेदावरीले काठमाडौं महानगरपालिकासँगकाे भेट पक्का गरेको हाे। निर्धारित ९० मिनेटसम्म दुबै तर्फबाट २-२ गाेलकाे बराबरी भएपछि खेलकाे निर्णय पेनाल्टीबाट गरिएको हाे। सुरुवाती अग्रता दक्षिणकालिका अमित तामाङले खेलकाे १५ औं मिनेटमा गरे। खेलकाे ४९औं मिनेटमा पासाङ तामाङले गाेदावरीका लागि बराबरी गाेल गरे। फेरि खेलकाे ८३औँ मिनेटमा दक्षिणकालिका लागि नवीन कर्माचार्यले गाेल गर्दै अग्रता दाेब्बर पारे। खेलकाे अन्तिम समयमा अनिल बाेम्जनले गाेल गर्दै बराबरी गाेल गरे। &nbsp;यसअघि कीर्तिपुर नगरपालिकालाई ३-० ले हराउँदै काठमाडौंले दोस्रो पटक उपाधी जित्ने अवसर बनाएको छ। पहिलो संस्करणमा चन्द्रागिरीलाई हराउँदै काठमाडौंले उपाधी जितेको थियो। आगामी जेठ २ गते हुने फाइनलमा काठमाडौंले गोदावरी नगरपालिकासँग प्रतिस्पर्धा गर्नेछ। गोदावरी मेयर कपमा काठमाडौ उपत्यकामा रहेका २१ पालिकामध्ये काठमाडौं जिल्लाबाट ६ , ललितपुरबाट ५ र भक्तपुरबाट २ पालिकाको सहभागिता रहेको छ।

दक्षिणकालीलाई हराउँदै आयोजककाे फाइनलमा

मोरक्को, रावत&nbsp;बैशाख ३१ गते मोरक्कोको राजधानी राबतमा मंगलवार सम्पन्न एआइपीएस स्पोर्ट्स मिडिया अवार्ड २०२४ को ‘वेस्ट इन्भेस्टिगेन’ विधामा नेपालका पत्रकारद्धय बीपी अनमोल र दीप सुवेदीले तयार पारेको लेखले ‘स्पेशल मेन्सन’ प्राप्त गरेको छ।&nbsp;यी दुई पत्रकारले उकालो डट कममा संयुक्त रुपमा लेखेको ‘१६ वर्षदेखि फरार अभियुक्त एन्फाको उपाध्यक्ष, लागूऔषध कारोबारमा तोकिएको थियो ५ वर्ष कैद’ लेखका लागि स्पेशल मेन्सन दिइएको हो। &nbsp;एआइपीएस स्पोर्टस् मिडिया अवार्डमा प्रत्येक विधाको शीर्ष ३ को उपाधि दौडमा नपरेको तर राम्रो आलेखहरुलाई स्पेशल मेन्सनमा उल्लेख गरिन्छ।&nbsp;यसअघि नेपालका खेल पत्रकारहरु गोविन्दराज नेपाल र नमिन ढकालको आलेख पनि स्पेशल मेन्सनमा परेका थिए। सन् २०२० को हंगेरीमा भएको एआइपीएस स्पोर्टस मिडिया अवार्डमा भने प्रज्वल ओलीको लेखले ‘वेस्ट कोलम’ विधामा अवार्ड जितेको थियो। उनी एआइपीएस अवार्ड जित्ने एसियाको पहिलो पत्रकार पनि बनेका थिए।&nbsp;एआइपीएस स्पोर्टस मिडिया अवार्ड खेलपत्रकारहरुको विश्व संस्था एआइपीएसले हरेक वर्ष प्रदान गर्ने खेल पत्रकारहरुको सबैभन्दा ठूलो अवार्ड कार्यक्रम हो।&nbsp;यसमा शीर्ष ३ मा पर्ने विधाका विजेताहरुले क्रमश: ८ हजार, ३ हजार र २ हजार अमेरिकी डलर प्राप्त गर्नेछ।विभिन्न १२ विधामा प्रदान गरिने अवार्डका लागि यसवर्ष १३६ देशबाट २०६५ पत्रकारहरुले आलेख, फोटो, भिडियो, अडियोमा प्रतिस्पर्धा गरेका थिए।

बीपी र दीपको आलेखलाई ‘स्पेशल मेन्सन’

काठमाडौं। नेपाली राष्ट्रिय क्रिकेट टाेलीका लेग स्पिनर सन्दीप लामिछाने नेपाल क्रिकेट संघ -क्यान_ को केन्द्रीय सम्झौतामा नरहने भएका छन्। उनले बुधबार सामाजिक सञ्जाल फेस्बुकमा उक्त जानकारी दिएका हुन्। ‘धेरै सोचविचार पछि मैले यस पटकको लागि क्यान केन्द्रीय सम्झौताअन्तर्गत निरन्तरता नदिने निर्णय गरेको छु। यो क्रिकेट वा मेरो राष्ट्रबाट एक कदम टाढा होइन, यो व्यक्तिगत र व्यावसायिक रूपमा विकास गर्ने दिशामा एक कदम हो,’ उनले लेखेका छन्। क्यानले सन्दीपसहित ३३ पुरुष र १९ महिला क्रिकेटरलाई केन्द्रीय सम्झौतामा राखेको थियो। सन्दीप ‘ए’ ग्रेडमा थिए। उनले मासिक एक लाख रुपैयाँ पाउँदै आएका थिए। यस निर्णयपछि आफू खेलिरहने उनले बताएका छन्। ‘म अझै पनि नेपालका लागि खेलिरहनेछु। सधैंझैं उही जोश, उही समर्पणका साथ। नेपालको जर्सी लगाउनु मेरो लागि सधैं गर्वको कुरा हो र यो जिम्मेवारी सधैं मेरो हृदयमा रहनेछ,’ उनले लेखेका छन्।

क्यानसँगको सम्झौतामा नरहने सन्दीपको घोषणा

काठमाडौं। ब्वाइज युनियन क्लबले सहिद स्मारक ‘बी’ डिभिजन लिगमा सहज जित हासिल गरेको छ। सातदोबाटोस्थित एन्फा कम्प्लेक्स मैदानमा बुधबार सम्पन्न खेलमा ब्वाइज युनियनले श्रीकुमारी क्लबलाई ५–३ ले पराजित गरेको हो। ब्वाइज युनियनको जितमा दिव्यविक्रम चौधरीले दुई गोल गरे। सुजित बूढाथोकी, विनोद राई र सुशान्त लामाले समान एक गोल थपे। कुमारीका पाल्देन तामाङ, अरुण शाह र यमन महर्जनले गोल गरे पनि हारबाट जोगाउन सकेनन्। यो नतिजासँगै तेस्रो स्थानमा उक्लिएको ब्वाइज युनियनले ११ खेलबाट १८ अंक पुर्‍याएको छ। समान खेलबाट कुमारीको १३ अंक छ। कुमारीलाई अझै रेलिगेसनको खतरा यथावत् छ।

श्रीकुमारीमाथि ब्वाइज युनियनको सहज जित

काठमाडौं। आइसिसी विश्वकप लिग २ अन्तर्गत त्रिकोणात्मक एकदिवसीय सिरिजका लागि स्कटल्यान्ड जाने नेपाली क्रिकेट टोलीको बिदाइ भएको छ। नेपाल क्रिकेट संघ(क्यान) का अध्यक्ष चतुरबहादुर चन्द, सचिव पारस खड्का, केन्द्रिय सदस्य छुम्बी लामा लगायतले मंगलबार टोलीको बिदाइ गरे। सिरिजअघि नेपालले बेलायतको स्थानियन टोली तथा स्टकल्यान्डको ‘ए’ टोलीसँग अभ्यास खेल खेल्नेछ।&nbsp; नेपाली टोली मंगलबार साँझ ६ बजे बेलायत प्रस्थान गर्नेछ। बिदाइ कार्यमक्रममा मुख्य प्रशिक्षक स्टुवार्ट ल र कप्तान रोहितकुमार पौडेल भने उपस्थित थिएनन्। नेपाली टोली रोहितकुमार पौडेल (कप्तान), गुलशनकुमार झा, आसिफ शेख, करण केसी, सोमपाल कामी, कुशल भुर्तेल, ललितनारायण राजवंशी, अनिलकुमार साह, दीपेन्द्रसिंह ऐरी (उप कप्तान), सन्दीप लामिछाने, भीम सार्की, आरिफ शेख, बसिर अहमद, नन्दन यादव, रिजन ढकाल

लिग-२ खेल्ने नेपाली टोलीको बिदाइ

३० बैशाख, काठमाडौं । हाउण्ड्स एकेडेमीले हिमालयन जाभा बास्केटबल लिग (एचजेबीएल) मा लगातार तेस्रो जित हात पारेको छ ।&nbsp; कीर्तिपुर कभर्डहलमा मंगलबार भएको खेलमा हाउण्ड्सले सामाखुशी युथ क्लबलाई ९८-७२ ले पराजित गरेको हो ।&nbsp;हाउण्ड्सले गत साता रोएल्स र टाइम्स बास्केटबल क्लबलाई पराजित गरेको थियो ।&nbsp;लगातार तेस्रो जितपछि हाउण्ड्स ९ अक जोडेर शीर्ष स्थानमा छ । सामाखुशीकव भने यो लगातार तेस्रो हार हो । अकविहिन सामाखुशी पूछारमा छ ।&nbsp;सामाखुशी विरुद्ध सुरुवातदेखि नै अग्रता लिएको हाउण्ड्सले चारै क्वाटर आफ्नो पक्षमा पारेको थियो । &nbsp;हाउण्ड्सले पहिलो क्वाटरमा २६, दोस्रो क्वाटरमा २३ अंक जोडेको थियो । यस्तै तेस्रोमा २४ र चौथो क्वाटरमा २५ अंक जोडेको थियो । सामाखुशीले चारै क्वाटरमा समान १८ अंक जोडेको थियो ।&nbsp;हाउण्ड्सका लागि विजय बुर्जाले सर्वाधिक २२ अंक स्कोर गरे । सामाखुशीका लागि विक्रम डंगोलले १५ अंक स्कोर गरे ।&nbsp;खेलको मोस्ट भ्यालुएबल प्लेअर हाउण्ड्सका दिप्सन केसी घोषित भए ।&nbsp;एचजेबीएलमा बुधबार रोएल्स र टाइम्स बास्केटबल क्लब तथा गोल्डेनगेट बास्केटबल क्लब र कीर्तिपुर बास्केटबल क्लबबीच प्रतिस्पर्धा हुनेछ ।

एचजेबीएलमा हाउण्ड्सको लगातार तेस्रो जित

ललितपुर। काठमाडौं महानगरपालिका गोदावरी नगरपालिकाको आयोजनामा जारी उपत्यकाव्यापी अन्तरपालिका खुला गोदावरी मेयर कप फुटबलको फाइनलमा पुगेको छ।&nbsp; गोदावरी–१० टाहाखेलस्थित निर्माणाधीन गोदावरी बहुउद्देश्यीय रंगशालाको झ्यालुन्टार मैदानमा मंगलबार सम्पन्न पहिलो सेमिफाइनलको खेलमा कीर्तिपुर नगरपालिकालाई ३-० ले हराउँदै काठमाडौंले दोस्रो पटक उपाधी नजिक पुगेको हो। यसअघि पहिलो संस्करणमा चन्द्रागिरीलाई हराउँदै काठमाडौंले उपाधि जितेको थियो। काठमाडौंका लागि खेलमा प्लेयर अफ दि म्याच मनिष सेढाईले २ गोल तथा राज पौडेलले १ गोल गरे।&nbsp; आगामी जेठ २ गते हुने फाइनलमा काठमाडौंले गोदावरी नगरपालिका र दक्षिणकाली नगरपालिकाबीचको विजेतासँग प्रतिस्पर्धा गर्नेछ।&nbsp; खेलको ४५औं मिनेटमा सेढाईले काठमाडौंका लागी सुरुवाती गोल गरे भने &nbsp;लगत्तै ईन्जुरी समयमा पौडेलले थप गोल गर्दै अग्रता दोब्बर पारे।&nbsp; काठमाडौंका लागि अर्को एक गोल सेढाईले ७९औं मिनेटमा गरे।काठमाडौं समूह बि को विजेताका रुपमा सेमिफाइनलमा पुगेको हो भने कीर्तिपुर समूह डि को विजेताका रुपमा सेमिफाइनलमा प्रवेश गरेको हो।&nbsp;

काठमाडौं गोदावरी मेयर कपको फाइनलमा

काठमाडौं। प्लानिङ ब्वाइज युनाइटेड &nbsp;‘ए’ डिभिजन लिगमा बढुवा भएको छ। सातदोबाटोस्थित एन्फा कम्प्लेक्समा मंगलबार सम्पन्न खेलमा प्लालिङले बाँसबारी क्लबलाई २–० ले पराजित गरेको हो। प्लानिङको जितमा पुजन थापाले एक गोल गरे। अर्को भने उपहार पाएको थियो।&nbsp; पहिलो हाफ दुवै टोलीले गोलरहित बराबरी खेलेका थिए। तर, दोस्रो हाफको दोस्रो मिनेटमा बाँसबारीका सन्दीप राउतले आत्मघाती गोल गर्न पुगे। ८१औं मिनेटमा पुजनले अर्को गोल गर्दै जित पक्का गरे। जितसँगै शीर्ष स्थानमा रहेको प्लानिङले ११ खेलबाट २७ अंक पुर्‍याएको छ। बाँसबारीको समान खेलबाट १५ अंक छ।

प्लानिङ ब्वाइज ‘ए’ डिभिजनमा बढुवा

काठमाडौं। नेपाल आइसिसी महिला टी–२० विश्वकप एसिया छनोटमा हङकङसँग पराजित भएको छ। मंगलबार सम्पन्न खेलमा नेपाल सात विकेटले पराजित भएको हो। नेपालले दिएको ३० रनको लक्ष्य हङकङले तीन बल बाँकी रहँदा तीन विकेट गुमाएर पूरा गरेको हो। हङकङका शान्जिन शहजादले अविजित रहँदै सर्वाधिक १५ रन बनाइन्। १२ बल खेलेकी उनले एक छक्का प्रहार गरिन्। मारिको हिल ११ रनमा आउट भइन्। नेपालकी कविता कुँवरले दुई विकेट लिइन्। १.३ ओभर बलिङ गरेकी उनले पाँच रन खर्चिइन्। त्यसअघि टस हारेर पहिला ब्याटिङ थालेको नेपालले निर्धारित पाँच ओभरमा तीन विकेट गुमाउँदै २९ रन बनायो। वर्षाका कारण खेल पाँच ओभरमा खेलाइएको थियो। नेपालकी सम्झना खड्काले सर्वाधिक १० रन बनाइन्। सात बल खेलेकी उनले एक चौका प्रहार गरिन्। कप्तान इन्दु बर्माले अविजित रहेर ९ रन बनाइन्। पूजा महतो तीन, कविता कुँवर दुई रनमा आउट हुँदा रुविना क्षेत्री बेलबासे चार रनमा अविजित रहिन्। हङकङकी मेई बाई सियुले तीन विकेट लिइन्। दुई ओभर बलिङ गरेकी उनले ११ रन खर्चिइन्। जितसँगै हङकङ समूह सी को शीर्ष स्थानमा उक्लिएको छ। हङकङको तीन खेलबाट चार अंक छ। नेपालको भने समान खेलबाट तीन अंक छ।

Nepalsports

⚽ Upcoming Matches

🎖 Recent Matches

📰 Recent News

Nepalsports