इंग्लिस प्रिमियर लिगमा दुई लन्डन क्लबले शनिबार फरक नियति भोगेका छन् । आर्सनलले फुलहमलाई सजिलै ३–० ले पराजित गरेपछि शीर्ष स्थानमा छ अंकको अग्रता लिएको छ । यससँगै आर्सनलसामु २२ वर्षयता पहिलो पटक लिग उपाधि जित्ने आधार तयार भएको छ ।

त्यसमा भिक्टोर ग्योकुरेसले दुई तथा बुकायो साकाले एक गोल गरे । यो नतिजापछि आर्सनलको ३५ खेलबाट ७६ अंक भएको छ । म्यानचेस्टर सिटी ७० अंकमा दोस्रो स्थानमा छ र उसले दुई खेल कम खेलेको छ ।

अर्को खेलमा ब्रेन्टफोर्डले वेस्ट ह्यामलाई ३–० ले हरायो र यसले वेस्ट ह्यामाथि रेलिगेसन दबाब बढेको छ । वेस्ट ह्याम ३६ अंकमा १७ औं स्थानमा छ र उसको ठीक पछाडि रहेको टोटनहमसामु रेलिगेसन क्षेत्र छाड्ने अवसर बनेको छ ।

अन्य खेलमा न्युकासल युनाइटेडले ब्राइटनमाथि ३–१ जित दर्ता गर्‍यो भने उल्भ्स र सन्डरल्यान्डले १–१ को बराबरी खेले ।