सन्डरल्यान्डको चौथो स्थानमा छलाङ

इंग्लिस प्रिमियर लिगमा सन्डरल्यान्डले शनिबार नटिङघम फरेस्टलाई १–० ले हराएको छ र यससँगै ११ अंकमा चौथो उक्लेको छ । यसपल्ट बढुवा भएको सन्डरल्यान्डलाई रेलिगेसनको दावेदार मानिएको थियो ।

तर उसको अहिलेसम्मको प्रदर्शन राम्रो रहेको छ । सन्डरल्यान्डको अहिलेको जितमा ओमर एल्डरेटले पहिलो हाफको ३८ औं मिनेटमा निर्णायक गोल गरे ।

अर्को खेलमा टोटनहमले खेलको अन्त्यतिर जाओ पाल्हिन्हाले गरेको गोलको मदतले उल्भ्सलाई १–१ को बराबरीमा रोक्यो । लिग तालिकाको अन्तिम स्थानको उल्भ्सले सान्टियागो बुएनोको गोलले ५४ औं मिनेटमा अग्रता लिएको थियो ।

यो नतिजासँगै उल्भ्सले यसपल्टको लिगमा पहिलो अंक बटुल्न सफल रह्यो । टोटेनहम भने ११ अंकमा तेस्रो स्थानमा रह्यो ।