साउदीको पोस्टमा कोरियाको १५ गोल

काठमाडौं। उत्तर कोरियाले भुटानमा जारी ‘एएफसी यु–२० एसियन कप छनोट’मा सानदार सुरुआत गरेको छ ।

भुटानकाे राजधानी थिम्पुस्थित चाङ्लिमिथाङ रंगशलामा बुधबार सम्पन्न समूह ‘ए’को पहिलो खेलमा उत्तर कोरियाले कमजोर टोली साउदी अरेबियामाथि १५-० को फराकिलो जित दर्ता गरेकाे हाे।

पहिलो हाफमा ९ गोलको अग्रता लिएको कोरियाले दोस्रो हाफमा थप ६ गोल गर्न सफल भयाे।

यो जितसँगै पहिलो खेलबाट कोरियाले तीन अंक जोड्न सफल भएकाे छ। साउदीले भने हारबाट प्रतियाेगिताकाे सुरुआत गरेकाे छ।

यस्तै, छनोट प्रतियोगितामा सहभागी ३२ टोलीलाई ८ समूहमा विभाजन गरिएको छ। सिंगल राउन्ड रोविन पद्धतिको प्रतिस्पर्धापछि समूहको शीर्षस्थानमा रहने टोलीले अर्को वर्ष थाइल्यान्डमा हुने यु–२० एसियन कपको १२औं संस्करणमा स्थान बनाउने छ।