फिफा विश्वकप: राउन्ड अफ ३२ का अन्तिम तीन खेल हुँदै

काठमाडौं। अमेरिका, मेक्सिको र क्यानडामा संयुक्त रूपमा जारी फिफा विश्वकप २०२६ अन्तर्गत राउन्ड अफ ३२ का अन्तिम तीन खेल शुक्रबार रातिदेखि शनिबार बिहानसम्म हुने भएका छन्। ती खेलपछि क्वार्टरफाइनल पुग्ने सबै टोलीको टुंगो लाग्नेछ।

पहिलो खेल टेक्सासको डलासमा शुक्रबार राति ११:४५ बजे सुरु हुनेछ, जहाँ समूह डीको उपविजेता अष्ट्रेलियाले समूह जीको उपविजेता इजिप्टसँग प्रतिस्पर्धा गर्नेछ। दुवै टोली समूह चरणमा प्रभावशाली प्रदर्शन गर्दै नकआउट चरणमा पुगेका हुन्। क्वार्टरफाइनल प्रवेशको लक्ष्यसहित मैदान उत्रिने यी दुई टोलीबीच कडा प्रतिस्पर्धा हुने अपेक्षा गरिएको छ।

दोस्रो खेल शनिबार बिहान ३:४५ बजे मियामीमा हुनेछ। समूह जेको विजेता तथा साविक विश्वविजेता अर्जेन्टिनाले अफ्रिकी राष्ट्र केप भर्डेसँग भिड्नेछ। अर्जेन्टिनाले समूह चरणका तीनै खेल जित्दै शतप्रतिशत नतिजासहित अन्तिम ३२ मा स्थान बनाएको थियो। लियोनेल स्कालोनीको टोली त्यही लयलाई निरन्तरता दिँदै क्वार्टरफाइनल यात्रा सुरक्षित गर्ने लक्ष्यमा हुनेछ।

यता, केप भर्डेले समूह ‘एच’ मा स्पेन, उरुग्वे र साउदी अरेबियासँगका तीनै खेल बराबरी खेल्दै उत्कृष्ट तेस्रो टोलीका रूपमा नकआउट चरणमा स्थान बनाएको हो। बलियो अर्जेन्टिनाविरुद्ध अप्रत्याशित नतिजा निकाल्दै इतिहास रच्ने लक्ष्यका साथ केप भर्डे मैदानमा उत्रिनेछ।

राउन्ड अफ ३२ को अन्तिम खेल शनिबार बिहान ७:४५ बजे हुनेछ। समूह केको विजेता कोलम्बियाले समूह एलबाट उत्कृष्ट तेस्रो टोलीका रूपमा अगाडि बढेको घानासँग प्रतिस्पर्धा गर्नेछ। समूह चरणमा उत्कृष्ट लयमा देखिएको कोलम्बिया जित निकाल्दै क्वार्टरफाइनल पुग्ने योजनामा छ भने घाना बलियो प्रतिद्वन्द्वीलाई स्तब्ध पार्दै अन्तिम आठमा स्थान बनाउने लक्ष्यमा हुनेछ।