पाकिस्तान साफ च्याम्पियनसिपको फाइनलमा

साफ च्याम्पियनसिप २०२६ को दोस्रो सेमिफाइनलमा पाकिस्तानले आयोजक बंगलादेशलाई १-० गोलले पराजित गर्दै इतिहासमा पहिलो पटक प्रतियोगिताको फाइनलमा प्रवेश गरेको छ।

शनिबार ढाकास्थित राष्ट्रिय रंगशालामा भएको खेलको निर्धारित समय सकिन ५ मिनेट बाँकी रहँदा पाकिस्तानका खेलाडी अब्दुल समदले निर्णायक गोल गरे। बंगलादेशका गोलकिपर मेहदी हसन स्राबोनले समदको प्रहार रोक्न नसक्दा बंगलादेशको फाइनल पुग्ने सपना टुटेको छ ।

यस जितसँगै पाकिस्तानले साफ च्याम्पियनसिपको इतिहासमा पहिलो पटक फाइनलमा स्थान बनाएको छ। फाइनल खेलमा पाकिस्तानले भारतसँग प्रतिस्पर्धा गर्नेछ ।

बंगलादेशका लागि यो हार निकै पीडादायी रह्यो। खेल सकिएपछि रंगशालामा रहेका केही दर्शकहरूले रंगशालामा आतिसबाजी प्रहार गरेका थिए भने दुवै टोलीका खेलाडीबीच केहीबेर तनावको स्थिति पनि देखिएको थियो ।