मिलानको जितमा लिओको निर्णायक गोल

राफेल लिओले दोस्रो हाफको सुरुमा गरेको निर्णायक गोलको मदतले एसी मिलानले इटालीको सिरी ए मा शनिबार लाजियोलाई १–० ले हराएको छ । सानसिरोमा लिओले ५१ औं मिनेटमा एक मात्र गोल गरे ।

यो जितपछि मिलानको १३ खेलबाट २८ अंक भएको छ र शीर्ष स्थानमा उक्लेको छ । तर उनको यो अग्रता एकै दिनका लागि मात्र हुन सक्नेछ ।

उसको पछाडि एएस रोमाको २७, नेपोलीको २५ र इन्टर मिलानको २४ अंक छ । उनीहरूसामु मिलानमाथि चुनौती थप्ने अवसर हुनेछ ।

शनिबार युभेन्ट्सले कागलिरीलाई २–१ ले हराएयो र१३ खेलबाट २३ अंकसहित सातौं स्थानमा रह्यो । अन्य खेलमा युडिनेजीले पार्मालाई २–० र जेनोआले हेलास भेरोनालाई २–१ ले पराजित गर्न सफल रह्यो ।