एमबापेको गोलमा रियलको जित

केयलिन एमबापेले पेनाल्टीबाट गरेको निर्णायक गोलको मदतले रियल म्याड्रिडले मंगलबार ओसासुनालाई १–० ले पराजित गरेको छ । यससँगै रियलले नयाँ प्रशिक्षक ज्याभी एलोन्सोको नेतृत्वमा लिगको नयाँ सिजन विजयी सुरुआत पनि लिएको छ ।

गत सिजनको युरोपेली गोल्डेन बुट अवार्ड विजेता एमबापेले ५१ औं मिनेटमा गोल गरे । ओसासुना डिफेन्डर जुवान क्रुजले एमबापेलाई पेनाल्टी एरियामा लडाएपछि रियलले पेनाल्टीको अवसर पाएको थियो । सन् २००८ यता रियल नयाँ सिजनको पहिलो लिग खेलमा अपराजित रहेको छ ।

क्रोएसियाका लुका मोडरिचलले छाडेयता खालि रहेको १० नम्बर जर्सि एमबापे लगाएर खेले । ओसासुनाविरुद्ध नै लिभरपुलबाट आएका एलेक्जान्डर आर्नोल्डले रियलका लागि डेब्यु गरेका छन् ।