इटालीमा उपाधि होड रोमाञ्चक हुँदै

इटालीको सिरी ए मा यसपल्ट उपाधिको होड रोमाञ्चक हुने भएको छ । लिग तालिकाको शीर्ष स्थानमा रहेको इन्टर मिलान र एएस रोमाले आफ्नो घरेलु मैदानमा आइतबार सजिलो जित निकालेका छन् । 

इन्टरले लाजियोलाई २–० ले हरायो र त्यसमा लउटारो मार्टिनेज र एन्गे–योन बोनीले एक एक गोल गरे । रोमाले अर्को खेलमा युनिडेजीलाई २–० ले नै हरायो र त्यसमा भने लोरेन्जो पेलेग्रिनी र मेहमेट जेकी सेलिकले गोल गरे ।

यो नतिजापछि इन्टरको ११ खेलबाट २४ अंक भएको छ । रोमाको पनि समान २४ अंक छ । दुई टिम गोल अन्तरले छुटिएका हुन् । उनीहरूको पछाडि एसी मिलान र नेपोली छन् । यी दुई टिमको समान २२ अंक रहेको छ ।