दोस्रो हिमालयन फुटसल गोल्डकप भदौ १२ र १३ गते

काठमाडौं। दोस्रो हिमालयन फुटसल गोल्डकप भदौ दोस्रो साता हुने भएको छ।

आयोजक हिमालयन फुटबल क्लबले बुधबार पत्रकार सम्मेलन गर्दै प्रतियोगिता भदौ १२ र १३ गते हुने जानकारी दिएको हो।

प्रतियोगिताको विजेताले तीन लाख रुपैयाँ पाउने छ। उपविजेतालाई भने एक लाख रुपैयाँ दिइने क्लबका अध्यक्ष विनोद कार्कीले बताए। यस्तै, विधागततर्फ अनुशासित टिमले २० हजार रुपैयाँ पाउनेछ। सर्वोत्कृष्ट खेलाडी र उत्कृष्ट गोलरक्षकले समान १० हजार रुपैयाँ पाउनेछ भने उत्कृष्ट म्यानेजर र उत्कृष्ट प्रशिक्षकलाई समान ५ हजार रुपैयाँ दिइने उनले जानकारी दिए।

टिम दर्ताको लागि ५ गतेसम्म मिति तय गरिएको छ। टिम दर्ताको लागि १५ हजार तोकिएको छ। खेल तालिका भदौ १० गते सार्वजनिक हुने बताइएको छ। प्रतियोगितामा काठमाडौं उपत्यकाभन्दा बाहिरबाट आउने टिमलाई खाना र आवासको व्यवस्थापन आयोजकले नै गरेको क्लबका अध्यक्ष कार्कीले बताए।