इंग्ल्यान्डले काट्यो विश्वकपको टिकट

इंग्ल्यान्ड विश्वकप २०२६ मा छनोट हुने पहिलो युरोपेली देश भएको छ । यो उपलब्धी चुम्न उसले मंगलबार रिगामा भएको खेलमा लात्भियामाथि सजिलो ५–० को जित हात पार्‍यो । 

त्यसमा एकपल्ट फेरि ह्यारी केन नायक रहे । उनले दुई गोल गरे र त्यसमध्ये दोस्रो गोल पेनाल्टीबाट भएको थियो । यस्तै एन्टोनी गोर्डेन र इबेरेची इजीले पनि एक एक गोल गरे । अर्को एक गोल भने आत्मघाती रह्यो ।

यो जितपछि इंग्ल्यान्ड युरोपेली छनोटको समूह ‘के’ को शीर्षमा रहने निश्चित भएको छ । उसले छनोटमा दुई खेल बाँकी छँदै विश्वकपको अन्तिम चरणमा प्रवेश गर्न सफल भएको हो ।