इजिप्टले काट्यो विश्वकपको टिकट

इजिप्ट विश्वकप २०२६ मा छनोट हुने तेस्रो अफ्रिकी टिम बनेको छ र यसका नायक रहे, मोहमद सलाह । यसका लागि उसले बुधबार भएको खेलमा जिबुटीलाई ३–० ले हरायो । लिभरपुलका लागि लय गुमाएका सलाहले आफ्नो देशका लागि उत्कृष्ट प्रदर्शन गरे ।

यो जितपछि इजिप्टले अफ्रिकी विश्वकप छनोटको समूह ‘ए’ मा पाँच अंकको अग्रता लिएको थियो र यो निर्णायक सावित भएको छ । अब समूहको दोस्रोमा रहेको बुरकिना फासोले अब इजिप्टलाई उछिन्न सक्ने छैन् ।

क्यासाब्लान्कामा भएको खेलमा लिभरपुलका स्टार खेलाडी सलाहले दुई गोल गरे । उनले १४ र ८४ औं मिनेटमा गोल गरे । पहिलो गोल भने इब्राहिम एडेलले आठौं मिनेटमा गरे । यसअघि मोरक्को र ट्युनिसिया विश्वकपका लागि छनोट भइसकेका छन् ।