न्युकासलमाथि आर्सनलको पुर्नआगमन जित

आर्सनलले एक गोलले पछाडि रहेको स्थिति उल्टाएर आइतबार न्युकासल युनाइटेडलाई २–१ ले हराएको छ र अंक तालिकाको दोस्रो स्थानमा उक्लेको छ ।

यो जितपछि आर्सनलको छ खेलबाट १३ अंक भएको छ । लिभरपुल १५ अंकमा शीर्षमा छ, तर आर्सनलको जितले उसमाथि दबाब हुनेछ । आर्सनलको पछाडि क्रिस्टल प्यालेसको १२ र टोटनहमको ११ अंक छ ।

सेन्ट जेम्स पार्कमा भएको खेलमा न्युकासलले निक वाल्टमेडको गोलले ३४ औं मिनेटमा अग्रता लिएको थियो । त्यसपछि आर्सनलले खेलको अन्त्यतिर दुई गोल गरेको हो ।

त्यसमध्ये मिखेल मेरिनोले ८४ र ग्याब्रिएलले दोस्रो हाफको इन्ज्युरी समयको छैटौं मिनेटमा गोल गरे ।