१४ औं साग घोषित समयमै हुने

नेपाल ओलम्पिक कमिटी (एनओसी) ले बुधबार पत्रकार सम्मेलन गर्दै १४ औं दक्षिण एसियाली खेलकुद अब घोषित समयकै हुने बताएको छ । एनओसी अध्यक्ष जीवनराम श्रेष्ठले अनपेक्षित कुनै ठूलो समस्या नभए प्रतियोगिता हुनेमा अब शंका नभएको पनि बताए । इस्लामावादमा यसै साता बसेको दक्षिण एसियाली ओलम्पिक काउन्सिलको बैठकले यो प्रतियोगिता पाकिस्तानमा चैत २० देखि २८ मा गर्ने निर्णय गरेका थियो ।

त्यस बैठकमा अध्यक्ष श्रेष्ठसँग उपाध्यक्ष चतुरानन्दराज बैद्यले पनि भाग लिएका थिए । यस्तै राष्ट्रिय खेलकुद परिषदकी कार्यकारी सदस्य सिक्का सुवाल श्रेष्ठले पनि भाग लिएकी थिइन् । बैठकले अबको साग सम्बन्धी तयारी र अन्य विषयमा महत्त्वपूर्ण निर्णय गरेको थियो । यसअघि ओलम्पिक काउन्सिल अफ एसिया (ओसीए) को बहराइनमा भएको बैठकमा क्रममा पनि दक्षिण एसियाली प्रतिनिधिबीच अबको साग आयोजनाबारे छलफल भएको थियो ।

भारतले अबको सागमा सहभागिता जनाउने अथवा नजनाउने निश्चित छैन् । तर अध्यक्ष श्रेष्ठले यस विषयमा धेरै चिन्ता गर्न आवश्यक नभएको पनि बनाए । सागको पछिल्लो संस्करण सन् २०१९ मा नेपालमा भएको थियो र यसैक्रममा आयोजकका रूपमा पाकिस्तानलाई झण्डा हस्तान्तर गरिएको थियो । तर विभिन्न कारणले अहिलेसम्म प्रतियोगिता हुन सकेको छैन् ।

अहिलेसम्म तय कार्यक्रम अनुसार अबका सागमा २८ खेल समावेश गरिएका छन् । उद्घाटन र समापन समारोह इस्लामावादमा हुनेछ र एथलेटिक्स, ब्याडमिन्टन, बास्केटल, स्नुकर, फुटबल, कबड्डी, कराँते, रोइङ, स्क्वास, टेबल टेनिस, टेनिस, ट्रायथलन, भारोत्तोलन, उसु र सुटिङ गरेर १० खेल त्यहाँ हुनेछन् । लहोरमा बक्सिङ, क्रिकेट, फेन्सिङ, गल्फ, ह्यान्डबल, हक्की, रग्बी, पौडी, तेक्वान्दो र कुस्ती गरेर १० खेल हुनेछन् ।

 पेशवारमा भने आर्चरी, जुडो र भलिबल गरेर तीन खेल हुनेछन् । प्रारम्भिक सूची अनुसार  यी खेलमा ३ सय ४६ इभेन्ट्समा स्पर्धा हुनेछ । त्यसमा ३ सय ४६ स्वर्ण, ३ सय ४६ रजत र ५ सय १५ कांस्यका लागि प्रतिर्स्प्धा हुनेछ । यस्तै ३ हजार १ सय ७२ खेलाडी, १ हजार १९ पदाधिकारीको सहभागिता रहनेछ । नेपालका तर्फबाट ५ सय ३२ खेलाडी र १ सय ५३ पदाधिकारीले सहभागिता जनाउने छन् ।