आर्सनलको ८ अंकको अग्रता, चेल्सी र न्युक्यासल पनि विजयी

इंग्लिस प्रिमियर लिग फुटबलमा लिग लिडर आर्सनल विजयी बनेको छ । आइतबार राति भएको खेलमा आर्सनलले टोटेनहमलाई २-० गोल अन्तरले हराएको हो ।

खेलको १४ औं मिनेटमा गोलकिपर हुगो लोरिसले आत्मघाती गोल गरेपछि आर्सनलले सुरुआती अग्रता बनाएको थियो । त्यसपछि खेलको ३६ औं मिनेटमा मार्टिन ओडेगार्डले गोल गर्दै आर्सनललाई २-० को जित दिलाए ।

जितसँगै आर्सनलले शीर्ष स्थानमा ८ अंकको अग्रता बनाएको छ । आर्सनलले १८ खेलमा ४७ अंक जोडेको छ । टोटेनहम ३३ अंक जोडेर पाँचौं स्थानमा स्थानमा रहेको छ ।

यस्तै अन्य खेलमा चेल्सीले क्रिस्टल प्यालेसलाई १–० गोल अन्तरले हराएको छ ।

चेल्सीको जितमा काइ हाभर्ट्जले खेलको ६५औं मिनेटमा गरेको गोल नै निर्णायक बन्यो । जितसँगै १९ खेलमा २८ अङ्क जोडेको चेल्सी तालिकाको १०औं स्थानमा छ । क्रिस्टल प्यालेस २२ अङ्क जोडेर १२औं स्थानमा छ ।

गएराति नै भएको अर्को खेलमा न्युक्यासलले फुलह्यामलाई १–० गोल अन्तरले हराएको छ ।

जितसँगै अङ्क तालिकाको तेस्रो स्थानमा रहेको न्युक्यासलले ३८ अङ्क जोडेको छ ।