क्यानाडासँग नेपाल पराजित

क्यानाडाले आईसीसी मेन्स क्रिकेट वर्ल्डकप लिग–टुमा नेपाललाई शनिबार २४ रनले पराजित गरेको छ । जितका लागि २ सय ५७ रनको लक्ष्य पछ्याएको नेपाल ४६ ओभरमा २ सय ३२ रनमा अलआउट भएको थियो । यो जितपछि क्यानाडा २९ अंकमा छैटौं स्थानमा उक्लेको छ ।

नेपाल भने २८ अंकमा सातौं स्थानमा झरेको छ । नेपालका लागि ओपनर अर्जुन कुमालले १ सय १२ रनमा ८७ रन बनाए । यस्तै दीपेन्द्रसिंह ऐरीले २७ रन जोडे । इनिङ्सको अन्त्यतिर नेपालले लगातार विकेट गुमाएको थियो ।  

यसअघि टस जितेर पहिले ब्याटिङ गरेको क्यानाडाले ५० ओभरमा सबै विकेट गुमाएर २ सय ५६ रन बनाएको थियो । त्यसमा ओपनर युवराज शर्माले उत्कृष्ट शटकीय इनिङ्स खेले । उनले १ सय १७ बलमा १ सय ५ रन बनाए ।

युवराजले ११ चौका र ४ छक्का प्रहार गरे । उनले पहिलो विकेटका लागि आरोन जोन्सनसँग ७२ रनको साझेदारी गरेका थिए । जोन्सनले ३६ रन जोडे । नेपाली बलरमध्ये ललित राजवंशीले ४ र कप्तान सन्दीप लामिछानेले ३ विकेट लिए ।