नेपाल प्रिमियर कपको सेमिफाइनलमा

नेपालले लगातार तेस्रो जित निकाल्दै आइतबार एसीसी प्रिमियर कपको सेमिफाइनल यात्रा तय गरेको छ । मलेसियामा भइरहेको प्रतियोगितामा नेपालले साउदी अरेबियालाई पाँच विकेटले पराजित गरेको हो । नेपालले यसअघि बहराइन र मलेसियालाई पनि हराएको थियो ।

साउदी अरेबियाले भने लगातार तेस्रो हार बेहोरेपछि प्रतियोगितामा उसको चुनौती सकिएको छ । समूह ए को खेलमा साउदी अरेबियाले पहिले ब्याटिङ गर्दै ४९.२ ओभरमा सबै विकेट गुमाएर १ सय ९० रन बनाएको थियो । त्यसमा ओपनर अब्दुल वाहिदले सर्वाधिक ७७ रन बनाए ।

नेपाली बलरमध्ये कप्तान सन्दीप लामिछानेले १९ रन खर्चेर तीन विकेट लिए । नेपालले जवाफमा ४१ ओभरमा पाँच विकेट गुमाएर १ सय ९३ रन बनायो । त्यसमा गुल्सन झाले ४४ रन बनाए र नटआउट रहे । यस्तै इशान पाण्डेले ४० रन जोडे ।