आयोजक टोली केपी एफसी केपी ओली कपको सेमिफाइनलमा प्रवेश

आयोजक टोली केपी एफसी केपी ओली कपको सेमिफाइनलमा प्रवेश गरेको छ। शनिबार एन्फा कम्प्लेक्समा भएको खेलमा जावलाखेल युथ क्लबलाई पेनाल्टी सुटआउटमा ५-४ गोल अन्तरले पराजित गरेको हो। 

निर्धारित ९० मिनेट १-१ गोलको बराबरी भएपछि खेल पेनाल्टी सुटआउटमा गएको थियो । 

पेनाल्टीमा केपी एफसीका बिक्रम लामा, आदित्य शाक्य, अशोक खवास, लकेन लिम्बु र अनिल महर्जनले गोल गरे ।

जवालाखेलका सिमान्त थापा, समिराज थोकर, फोडे फोफाना र अब्दुलाजिज निशोनबोइभले गोल गरे ।

जावलाखेलका एनकोटो स्यानोउस मासोआबीको पेनाल्टी प्रहार गोलकिपर पूर्ण चेम्जोङले बचाएको थियो ।

पेनाल्टी अघि खेलको ४२ औं मिनेटमा राहुलले गोल गर्दै जावलाखेललाई सुरुआती अग्रता दिलाएका थिए ।

तर, खेलको ६८ औं मिनेटमा अजयी मार्टिन्सले गोल गर्दै केपी एफसीलाई १-१ गोलको बराबरीमा ल्याएका थिए ।

अब आयोजक टोलीले सेमिफाइनलमा मछिन्द्र फुटबल क्लबसँग प्रतिस्पर्धा गर्नेछ ।