भारत फेरि वुमेन्स साफ च्याम्पियन

भारतले शनिबार छैटौं पल्ट वुमेन्स साफ च्याम्पियनसिपको उपाधि जित्ने क्रममा दुई पल्टको डिफेन्डिङ बंगलादेशलाई ३–१ ले पराजित गरेको छ । पण्डित जवाहरलाल नेहरु स्टेडियममा भाएको फाइनलमा भारतका लागि प्यारी सासा, सनफिदा र लिन्डाले एक एक गोल गरिन् ।

बंगलादेशका लागि ऋतुपोर्ना चक्माले एक गोल फर्काइन् । समूह चरणमा पनि भारतले बंगलादेशलाई ३–० ले हराएको थियो । पहिलो संस्करणदेखि पाँचौं संस्करणसम्म लगातार उपाधि जितेको भारत अहिले नवौं संस्करणमा आएर घरेलु मैदानमा फेरि विजेता बनेको छ ।

त्यसबीच भने बंगलादेश दुई पल्ट च्याम्पियन भएको हो । उसले पछिल्लो दुई संस्करण जितेको थियो । सन् २०१६ को फाइनलमा पनि भारतले बंगलादेशलाई नै हराएको हो ।