काठमाडौं । च्याम्पियन लिगकै सर्वाधिक सफल टोलि रियल मड्रिडलाई हराउँदै लन्डन क्लब आर्सनल सेमिफाइनलमा प्रवेश गरेको छ। सान्तियागो बर्नाबेउनमै बुधबार राति रियल २–१ ले पराजित भयो। पहिलो लेगमा आर्सनल घरेलु मैदानमा ३–० ले विजयी भएको थियो। समग्रमा आर्सनल ५–१ ले विजयी भएको हो। अब, आर्सनलले फाइनल प्रवेशको लागि पेरिस सेन्ट जर्मेन (पिएसजी)सँग खेल्नेछ। यस्तै, आर्सनल सन् २००९ पछि सेमिफाइनलमा प्रवेश गरेको छ।

रियललाई हराउँदै आर्सनल सेमिफाइनलमा

काठमाडौं। एफसी चितवनलाई हराउँदै काठमाडौं रेजर्सले नेपाल सुपर लिग (एनएसएल) को प्लेअफ नजिक पुगेको छ। त्रिपुरेश्वरस्थित दशरथ रंगशालामा सोमबार सम्पन्न खेलमा काठमाडौंले चितवनलाई २–० ले पराजित गरेको हो। योसँगै तेस्रो स्थानमा उक्लिएको काठमाडौंले ६ खेलबाट आठ अंक पुर्‍याएको छ। धनगढीको पनि समान आठ नै अंक छ। तर, गोलअन्तरमा धनगढी अगाडि छ। ११ अंकसहित ललितपुर प्लेअफमा पुगिसकेको छ। धनगढीले दुई र ललितपुरले एक खेल खेल्न बाँकी छ। एक खेल नै खेल्न बाँकी रहेको चितवनको भने सात अंक छ। अब काठमाडौंले पोखरा र झापाको नतिजामा भर पर्नुपर्नेछ। एक खेल खेल्न बाँकी पोखराको पाँच र दुई खेल खेल्न बाँकी झापाको चार अंक छ। झापाले सोमबार नै धनगढीलाई चुनौती प्रस्तुत गर्दैछ। काठमाडौंलाई जित दिलायन बकारी माने र अमडोउ डिओपले गोल गरे। खेलको ३२औं मिनेटमै काठमाडौंले मानेको गोलमा सुरुआती अग्रता लिएको थियो। अट्याकिङ एरियामा पाएको फ्रिककलाई मानेले सहजै गोल गरेर जारी लिगमा चितवनले दोस्रोपल्ट गोल खाएको हो। यसअघि ललितपुरसँग पहिलो गोल खाँदा चितवन २–१ ले पराजित भएको थियो। पहिलो हाफको इन्जुरी समयमा मार्की प्लेयर अञ्जन खड्का मैदानबाट बाहिरिए।

चितवनलाई हराउँदै काठमाडौं तेस्रो स्थानमा

काठमाडौं। घरेलु टोली नेपालले आइसिसी यु–१९ विश्वकप एसिया छनोटमा &nbsp;लगातार दोस्रो जित हासिल गरेको छ।&nbsp; माथिल्लो मूलपानी क्रिकेट मैदानमा सोमबार सम्पन्न खेलमा नेपालले पाहुना टोली ओमानलाई आठ विकेटले पराजित गरेको हो।&nbsp; ओमानले प्रस्तुत गरेको ११८ रनको लक्ष्य नेपालले १४.३ ओभरमा दुई विकेट गुमाएर पूरा गरेको हो।&nbsp; नेपाललाई लगातार दोस्रो जित दिलाउन ओपनर नीरजकुमार यादवले सर्वाधिक ४६ रन बनाए। ३१ बल खेलेका उनले पाँच चौका र दुई छक्का प्रहार गरे। अर्का ओपनर साहिल पटेलले ४२ बलमा तीन चौका र एक छक्का प्रहार गरे। यी दुईबीच पहिलो विकेटका लागि ८५ रनको विशाल साझेदारी भएको थियो। नीरज ९.६ ओभरमा सौम्य भाविनको बलमा वर्षित साईबाट क्याच भए। साहिल भने १३.३ ओभरमा नेपालको स्कोर बोर्डमा १०६ रन हुँदा सौम्यकै बलमा हेमा रमेशबाट क्याच आउट भए।&nbsp; त्यसपछि क्रिजमा आएका कप्तान नरेन भट्टले १२ र सन्तोष यादवले १० अविजित रन बनाउँदै नेपालको जित पक्का गरे। ओमनका सौम्यले दुवै विकेट लिए। ६ ओभर बलिङ गरेका उनले ३१ रन खर्चिए। त्यसअघि टस हारेर पहिले ब्याटिङ गरेको ओमानले ३८ ओभरमा सबै विकेट गुमाउँदै ११७ रनको योगफल तयार गरेको थियो। ओमानका जीत वज्रेश शाहले अर्धशतकीय इनिङ्स खेले। उनले ७८ बलमा चार चौकासहित ५२ रन बनाए। तर, उनको इनिङ्सले ओमानलाई पहिलो जित दिलाउन सकेन। ओपनर सिद्धार्थ शंकरले १६ र हेमा रमेशले १० रन बनाए। अन्य ब्याटरले दोहोरो अंकमा रन बटुल्न सकेनन्। ओमानलाई सस्तैमा रोक्न नेपालका युवराज खत्रीले सर्वाधिक पाँच विकेट लिए। सात ओभर बलिङ गरेका उनले दुई मेडनसहित १५ रन खर्चिए।&nbsp; सन्तोषको नाममा दुई विकेट रहँदा दयान्द मण्डल, अपराजित पौडेल र अशोक धामीको नाममा समान एक विकेट रह्यो। जितसँगै दोस्रो स्थानमा रहेको नेपालले दुई खेलबाट चार अंक पुर्‍याएको छ। नेपालले पहिलो खेलमा युएईलाई डिएलएसबाट पाँच रनले हराएको थियो। ओमानको भने यो लगातार दोस्रो हार हो। पहिलो खेलमा अफगानिस्तानले ओमानलाई आठ विकेटले पराजित गरेको थियो।

नेपालको लगातार दोस्रो जित

काठमाडौं चारदेशिय टी–२० सिरिजको फाइनल खेलमा नेपाल ३ रनले पराजित भएको छ। आइतबार सम्पन्न खेलमा कुवेतले नेपालमाथि तीन रनको रोमाञ्चक जित हात पारेको हो। टी–२० मा कुवेतले पहिलोपल्ट नेपाललाई पराजित गर्न सफल भएको हो। यसअघि भएका दुवै भेटमा नेपालले कुवेतलाई ६ र ७ विकेटले पराजित गर्दै आफ्नो दबदबा कायम राखेको थियो। तर, नेपालले उक्त लयलाई निरन्तरता दिन नसक्दा लज्जास्पद हार बेहोर्न बाध्य भएको हो। कुवेतले प्रस्तुत गरेको १७५ रनको लक्ष्य पछ्याएको नेपालले १९.३ ओभरमा सबै विकेट गुमाउँदै १७१ रन मात्रै बनाउन सक्यो। नेपालका बसिर अहमद र नन्दन यादवबाहेक अन्य कुनै ब्याटरले सम्झनलायक प्रदर्शन गर्न सकेनन्। बसिरले सर्वाधिक ८० रन बनाए। ४३ बल खेलेका उनले आठ चौका र चार छक्का प्रहार गरे। नन्दनले १४ बलमा दुई चौका र चार छक्कासहित ३७ रन बनाए। यी दुईबीच नवौं विकेटका लागि ७३ रनको विशाल साझेदारी भएको थियो। योसँगै नेपाल जितनजिक पुगिसकेको थियो। तर, अन्तिम तीन बलमा तीन रन चाहिएको अवस्थामा क्लिन्टो एन्टोबाट बसिर क्याच हुन पुगे। कुवेतका अनुदीप चेन्थमाराले सर्वाधिक तीन विकेट लिए। २.३ ओभर बलिङ गरेका उनले १८ रन खर्चिए। यसिन पटेल र नवीनराज राजेन्द्रनले समान दुई विकेट लिँदा मोहमद असलमको नाममा एक विकेट रह्यो। त्यसअघि मिसन रोड मैदानमा टस हारेर पहिला ब्याटिङ थालेको कुवेतले निर्धारित २० ओभरमा सात विकेट गुमाउँदै १७४ रनको योगफल तयार पारेको थियो।

फाइनलमा नेपाल कुवेतसँग पराजित

काठमाडौं। घरेलु टोली नेपालले आइसिसी यु–१९ विश्वकप एसिया छनोटमा विजयी सुरुआत गरेको छ। तल्लो मुलपानी अन्तर्राष्ट्रिय क्रिकेट मैदानमा आइतबार सम्पन्न पहिलो खेलमा नेपालले युएईलाई डकवर्थ–लुइस मेथड (डिएलएस)मार्फत पाँच रनले पराजित गरेको हो। जितसँगै नेपालले दुई अंक हासिल गरेको छ। नेपालले प्रस्तुत गरेको २०१ रनको लक्ष्य पछ्याइरहेको युएईले ३६ ओभरमा सात विकेट गुमाउँदै १७१ रन बनाएको थियो। तर, वर्षा र खराब प्रकाशका कारण खेल रोकिएको थियो। युएईलाई डिएलएसबाट जित्न १७६ रनको खाँचो थियो। तर, चार ओभरअघि नै समाप्त गर्दा युएईको स्कोर बोर्डमा १७१ रन मात्रै भएपछि नेपाल पाँच रनले विजयी हुन पुगेको हो। युएईका किरण राईले सर्वाधिक १०४ रन बनाए। अविजित रहेका उनले ९६ बलमा आठ चौका र पाँच छक्का प्रहार गरेका थिए। मुहम्मद रायन खानले ५१ बलमा तीन चौका र दुई छक्कासहित ३५ रन बनाए। करण धिमन १५ रनमा आउट हुँदा अन्य ब्याटरले दोहोरो अंकमा रन बटुल्न सकेनन्। नेपालका अशोक धामी र सन्तोषकुमार यादवले समान दुई विकेट रह्यो। यस्तै, अभिषेक तियारी र नरेन भट्टले समान एक विकेट लिए।

नेपालको विजयी सुरुआत

&nbsp;काठमाडौं। ब्राजिली फुटबलका महान् खेलाडी रोबर्टो कार्लोस बैशाख ५ गते नेपाल आउने भएका छन्।&nbsp;नेपाल सुपर लिग (एनएसएल) आयोजक नेपाल स्पोर्ट्स एन्ड इभेन्ट्स म्यानेजमेन्ट प्रालिले बिहीबार ब्राजिलीयन लेफ्ट–ब्याक कार्लोस आउने पक्का भएको जानकारी दिएको हो। एनएसइएमका प्रबन्ध निर्देशक श्रेयंश कार्कीकाअनुसार कार्लोस दुईदिने विशेष भ्रमणमा काठमाडौं आउने भएका हुन्। उनका अनुसार कार्लोस बैशाख ६ गते त्रिपुरेश्वरस्थित दशरथ रंगशालामा आयोजना हुने पहिलो क्वालिफायर खेलको प्रमुख अतिथि रहनेछन्।

ब्राजिली फुटबलका महान् खेलाडी रोबर्टो कार्लोस बैशाख ५ गते नेपाल आउने

काठमाडौं। एफसी चितवनको अपराजित यात्रामा ‘ब्रेक’ लगाउँदै साबिक विजेता ललितपुर सिटी एफसी नेपाल सुपर लिग (एनएसएल) को अंक तालिकाको शीर्ष स्थानमा उक्लिएको छ। त्रिपुरेश्वरस्थित दशरथ रंगशालामा बिहीबार सम्पन्न खेलमा ललितपुरले २–१ को जित निकालेको हो। योसँगै चितवनको अपराजित यात्रामा ‘ब्रेक’ लागेको छ भने ललितपुरले भने आफ्नो लयलाई निरन्तरता दिएको छ। दोस्रो जित निकालेको ललितपुर आठ अंकसहित चितवनलाई उछिन्दै शीर्ष स्थानमा उक्लिएको छ। समान खेलबाट सात अंक रहेको चितवन एक स्थान तल झरेको छ। ललितपुरलाई जित दिलाउन मणिकुमार लामा निर्णायक बने। उनले एक असिस्ट र निर्णायक गोल गरे। यस्तै, इमो इजिकेलले ललितपुरको जितमा एक गोल थपे। चितवनका भिक्टर मानसरेले गोल गरे पनि सान्त्वना रह्यो।

टुंगियो चितवनको अपराजित यात्रा

काठमाडौं। ओपनर कुशल भुर्तेलको सानादार ब्याटिङसँगै नेपालले चारदेशिय टी–२० सिरिजमा लगातार दोस्रो जित निकालेको छ।&nbsp; बिहीबार बिहान सम्पन्न खेलमा नेपालले कुवेतलाई ६ विकेटले पराजित गरेको हो। जितसँगै नेपालले फाइनलको सम्भावना उच्च बनाएको छ। नेपालले पहिलो खेलमा कतारलाई आठ विकेटले पराजित गरेको थियो।योसँगै शीर्ष स्थानमा रहेको नेपालले चार अंक पुर्‍याएको छ। अब नेपालले लिग चरणको अन्तिम खेल शनिबार घरेलु टोली हङकङसँग खेल्नेछ। कुवेतले प्रस्तुत गरेको १८६ रनको लक्ष्य नेपालले १८.५ ओभरमा चार विकेट गुमाउँदै पूरा गर्‍यो। कुशलले सर्वाधिक ८१ रन बनाए। ५० बल खेलेका उनले समान ६ चौका र छक्का प्रहार गरे। अर्का ओपनर आसिफ शेखले ३८ बलमा दुई चौका र चार छक्कासहित ५३ रन बनाए। यी दुई ब्याटरबीच पहिलो विकेटका लागि १२७ रनको साझेदारी भएको थियफ। १३.५ ओभरमा आसिफ मोहम्मद अस्लामको बलमा निमिष लाथिफबाट क्याच आउट भएसँगै उक्त साझेदारी टुंगिएको थियो। कुशल मल्ल चार र दीपेन्द्रसिंह ऐरी ३१ रनमा आउट हुँदा कप्तान रोहितकुमार पौडेल चार र गुल्सनकुमार झा नौ रनमा अविजित रहे। हङकङका यासिन पटेलले सर्वाधिक दुई विकेट लिए। चार ओभर बलिङ गरेका उनले १७ रन खर्चिए। मोहम्मद शफिक र अस्लामको नाममा समान एक विकेट रह्यो। त्यसअघि मिसन रोड मैदानमा टस हारेर पहिला ब्याटिङ थालेको कुवेतले निर्धारित २० ओभरमा आठ विकेट गुमाउँदै १८५ रनको योगफल तयार गरेको थियो।

कुशलको सानदार ब्याटिङमा नेपालको लगातार दोस्रो जित

काठमाडौं। नेपाल सुपर लिग ९एनएसएल०मा साबिक उपविजेता धनगढी एफसी र पोखरा थन्डर्स बराबरीमा रोकिएका छन्। त्रिपुरेश्वरस्थित दशरथ रंगशालामा बुधबार सम्पन्न खेलमा यी दुई टोलीले गोलरहित बराबरी खेलेका हुन्। जारी प्रतियोगितामा धनगढीको यो लगातार दोस्रो बराबरी हो। बुटवल लुम्बिनी एफसीविरुद्ध ४–१ जितसहित प्रतियोगिता सुरुआत गरेको धनगढी दोस्रो खेलमा साबिक विजेता ललितपुर सिटी एफसीसँग गोलरहित बराबरी खेलेको थियो। लगत्तैको खेलमा पनि धनगढी गोलविहीन हुन पुगेको हो। यो नतिजासँगै अपराजित धनगढीले तीन खेलबाट पाँच अंक पुर्‍याएको छ। एक खेल बढी खेलेको पोखराको भने तीन अंक छ।

पोखरा र धनगढी बराबरीमा रोकिए

काठमाडौं। नेपालले चारदेशिय टी–२० सिरिजमा सुखद सुरुआत गरेको छ। बुधबार सम्पन्न पहिलो खेलमा नेपालले कतारलाई आठ विकेटले पराजित गरेको हो। कतारले प्रस्तुत गरेको १५२ रनको लक्ष्य पछ्याएको नेपालले १७ ओभरमा दुई विकेट गुमाउँदै १५४ रन बनायो। नेपालका ओपनर कुशल भुर्तेलले सर्वाधिक ३८ रन बनाए। १९ बल खेलेका उनले चार चौका र तीन छक्का प्रहार गरे। अर्का ओपनर आसिफ शेखले २१ बलमा चार चौकासहित ३३ रन बनाए।यी दुईले पहिलो विकेटका लागि ८१ रनको साझेदारी गर्दै नेपाललाई जितनजिक पुर्‍याएका हुन्। त्यसमा कप्तान रोहितकुमार पौडेलले ३७ र बसीर अहमदले ३० रन थपिदिए। यी दुवै ब्याटर अविजित रहे। कतारका मुजीब–उल–रहमानले दुई विकेट लिए। तीन ओभर बलिङ गरेका उनले १२ रन खर्चिए।&nbsp; त्यसअघि मिसन रोड मैदानमा टस हारेर पहिला ब्याटिङ थालेको कतारले निर्धारित २० ओभरमा पाँच विकेट गुमाउँदै १५१ रनको योगफल तयार गरेको थियो। यो नतिजासँगै नेपालले दुई अंक बटुलेको छ। अब नेपालले बिहीबार दोस्रो खेलमा कुवेतलाई चुनौती प्रस्तुत गर्नेछ।

कतारविरुद्ध नेपालको सहज जित

काठमाडौं। काठमाडौं रेजर्सले नेपाल सुपर लिग (एनएसएल) मा पहिलो जित निकालेको छ। त्रिपुरेश्वरस्थित दशरथ रंगशालामा मंगलबार सम्पन्न चौथो खेलमा काठमाडौंले प्रतियोगिताकै कमजोर टोली बुटवल लुम्बिनी एफसीविरुद्ध १–० को जित दर्ता गरेको हो।यो नतिजासँगै तेस्रो स्थानमा उक्लिएको काठमाडौंले चार खेलबाट पाँच अंक पुर्‍याएको छ। समान खेल खेलेको बुटवलको भने एक अंक छ। बुटवल अंक तालिकामा पुछारमा छ। गोलरहित बराबरीतर्फ उन्मुख खेलमा डिओपले निर्धारित समय सकिन दुई मिनेट बाँकी हुँदा गोल गरेका हुन्। भिन्सेन्ट कोजिइल्लोसँग तालमेल मिलाउँदै बक्स लाइननजिकबाट उनले प्रहार गरेको बललाई बुटवलका गोलकिपर दीप कार्कीले बचाउन सकेनन्।

एनएसएलमा काठमाडौंको पहिलो जित

काठमाडौं। नेपाल क्रिकेट संघ (क्यान)ले आइसिसी यु–१९ पुरुष क्रिकेट विश्वकप एसिया छनोट खेल्ने नेपालो अन्तिम टोली घोषणा गरेको छ। क्यानले मंगलबार नरेन भट्टको कप्तानीमा १४ सदस्सीय टोली घोषणा गरेको हो।&nbsp;टोलीमा अभिषेक तिवारी, नीरजकुमार यादव, साहिल पटेल, चिब्रन श्रेष्ठ, रोशन विश्वकर्मा, दर्श सोनार, सन्तोष यादव, अशोक धामी, दयानन्द मण्डल, अप्रजित पौडेल, युवराज खत्री र विपिनप्रसाद शर्मा छन्।&nbsp; नेपालले युएईसँग खेल्दै प्रतियोगिताको सुरुआत गर्नेछ। यी दुईबीचको खेल माथिल्लो मूलपानी अन्तर्राष्ट्रिय क्रिकेट मैदानमा अप्रिल १३ मा हुनेछ। नेपालले दोस्रो खेल अप्रिल १६ मा हङकङसँग खेल्नेछ। यस्तै, अन्तिम खेल अफगानिस्तानसँग खेल्ने क्यानले जनाएको छ।

यु-१९ विश्वकप एसिया छनोट खेल्ने नेपाली टोली घोषणा

काठमाडौं। गोलकिपर अञ्जना रानामगरले घरेलु टोली त्रिभुवन आर्मी क्लब छाडेर एपिएफ पुगेकी छिन्। करिब एक दशकदेखि आर्मीको जर्सीमा देखिँदै आएकी उनी अर्को विभागीय टोली एपिएफ बसाइ सरेकी हुन्। पछिल्लो समय एपिएफ भरपर्दो गोलकिपरविहीन छ। पहिलो रोजाइकी गोलकिपर तथा कप्तान अञ्जिला तुम्बाप्पो सुब्बा व्यावसायिक लिग खेल ग्रिस पुगेपछि एफिएफ सिनियर गोलकिपरविहीन भएको हो। त्यसैले एन्फा महिला लिगदेखि उमेर समूहबाट खेलिरहेकी सावित्री किशनलाई एपिएफले गोल पोस्टको जिम्मेवारी सुम्पिएको थियो।उनले यही लिगमार्फत गत भदौमा एपिएफको जर्सीमा डेब्यु गरेकी हुन्। डेब्यु लिगमा उनी उत्कृष्ट गोलकिपर घोषित भएकी थिइन्। उनले लिगबाहेक इलाममा आयोजित दोस्रो अन्तर्राष्ट्रिय महिला गोल्डकप र चितवनमा भएको राष्ट्रिय महिला फुटबल प्रतियोगितामा पहिलो रोजाइमा पर्दै एपिएफको पोस्ट सम्हालेकी थिइन्। अञ्जनाको प्रवेश भएसँगै सावित्री पुनः बेन्चै सीमित हुने पक्का भएको छ।

अञ्जना पुगिन एपिएफमा

काठमाडौं। हङकङमा हुने चारदेशिय टी–२०आई क्रिकेट सिरिज खेल्न जाने नेपाली टोलीको बिदाइ गरिएको छ। नेपाल क्रिकेट संघ (क्यान)ले सोमबार टोलीको बिदाइ गरेको हो। यस्तै, क्यानले नियुक्त गरिसकेको भनिएका मुख्य प्रशिक्षक स्टुअर्ट ल अझै नेपाल आइपुगेका छैनन्। त्यसैले नेपालले ९ देखि १३ अप्रिलसम्म हुने सिरिज उनीबिना नै खेल्ने भएको हो।&nbsp; नेपाली टिम भने पूर्वकप्तान ज्ञानेन्द्र मल्लले सम्हाल्ने भएका छन्। उनले पछिल्लो समय नेपाल ‘ए’ क्रिकेट टिम सम्हालेका थिए। सिरिजमा नेपाल र घरेलु टोली हङकङसहित कतार र कुवेतले सहभागिता जनाउने छन्। नेपालले बिहिवार कतारसँग खेल्दै प्रतियोगिताको सुरुआत गर्नेछ।&nbsp; दोस्रो खेल अप्रिल १० मा कुवेत र तेस्रो तथा अन्तिम खेल अप्रिल १२ मा हङकङसँग खेल्नेछ। लिग चरणमा शीर्ष दुई टोलीले फाइनल खेल्ने छन्। तेस्रो र चौथो स्थानमा रहने टोलीले तेस्रो स्थानका लागि प्रतिस्पर्धा गर्नेछन्।

हङकङ जाने नेपाली टोलीको बिदाइ

काठमाडौं । नेपाली राष्टिय महिला टोलीकी मिडफिल्डर रेणुका नगरकोटेलाई क्षेत्रप्रताप अधिकारी युवा प्रोत्साहन पुरस्कार-२०८१ बाट सम्मानित भएकी छन्।&nbsp; गुरुकुल एजुकेसनल फाउन्डेसन नेपालद्वारा आयोजित कार्यक्रममा रेणुकालाई साेमबार ५० हजार रुपैयाँसहित उक्त सम्मान प्रदान गरिएको हो। एनसिएम डेमा आयोजित कार्यक्रममा रेनुकालाई साहित्यकार विप्लप प्रतिक, गुरुकुल एजुकेसन फाउन्डेसनका अध्यक्ष विनोद दवाडी, एनसिएमका प्रिन्सिपल सुशिलभक्त माथेमा र गुरुकुल एजुकेसन फाउन्डेसनका कोषाध्यक्ष अमनप्रताप अधिकारीले सम्मान गरे।&nbsp; कोषध्यक्ष अधिकारीले रेणुकालाई ‘अनसिन हिरो’ को रूपमा सम्मान गर्दै भने, ‘रेनुकाले खेलकुद मैदानमा देखाएको प्रदर्शन होस वा जीवनको कठिन संघर्ष दुवैमा आगामी पुस्तालाई ठूलो प्रेरणा दिएको छ।’ राष्ट्रिय महिला फुटबल टोलीकी पूर्व कप्तान रेनुकाले सन् २०१० मा अन्तर्राष्ट्रिय डेब्यू गरेकी थिइन्।

रेणुकालाई क्षेत्रप्रताप अधिकारी युवा प्रोत्साहन पुरस्कार

काठमाडौँ । शीर्ष स्थानकाे लिभरपुल इङ्लिस प्रिमियर लिगमा फुलह्यामसँग स्तब्ध भएको छ। आइतबार राति सम्पन्न खेलमा फुलह्यामले लिभरपुललाई ३-२ गोल अन्तरले पराजित गरेको हो। फुलह्यामको जितमा रयान सेसेगनोन, एलेक्स इवोबी र रोड्रीगो मुनिजले एक एक गोल गरेका थिए। त्यस्तै लिभरपुलका लागि एलेक्सिस म्याक अलिस्टर र लुइस डियाजले एक एक गोल गरेका थिए। यो जितपछि फुलह्यामको ३१ खेलमा ४८ अंकसहित आठौ स्थानमा उक्लिएको छ। त्यस्तै लिभरपुल भने ३१ खेलमा ७३ अंकसहित शीर्ष स्थानमा कायम रहेको छ। लिभरपुल दोस्रो स्थानमा रहेको आर्सनल भन्दा ११ अंकले अगाडी रहेको छ।

शीर्ष स्थानको लिभरपुल स्तब्ध

काठमाडौं। एफसी चितवनले नेपाल सुपर लिग (एनएसएल)मा झापा एफसीसँग अंक बाँडेको छ। त्रिपुरेश्वरस्थित दशरथ रंगशालामा आइतबार सम्पन्न खेलमा चितवनले झापासँग १–१ को बराबरी खेलेको हो।&nbsp; चितवनका टेरिक जेब्रनले गोल गरे। झापाका अलहाजी गिरोले बराबरी गोल फर्काएका हुन्। २८औं मिनेटमा चितवनले गोल सुरुआती अग्रता लिएको थियो। झापाले यस सिजन बेहोरेको यो नै पहिलो गोल हो। तर, जितनजिक पुगिसकेको चितवनलाई रोक्न एरोन थापा नायक बने। बेञ्चबाट सुरुआत गरेका उनको ‘स्मार्ट मुभ’का कारण झापाले खेलमा फर्किने अवसर प्राप्त गर्‍यो। ९२औं मिनेटमा नीरज चौधरीले बल अगाडि बढाइरहेका एरोनलाई पेनाल्टी बक्सभित्र लडाएपछि झापाले खेलमा फर्किने अवसर प्राप्त गरेको थियो। उक्त पेनाल्टीलाई गिरोले गोलमा परिणत गर्दै झापालाई हारबाट जोगाए। जारी प्रतियोगिता नाइजेरियन खेलाडी र झापाको यो नै पहिलो गोल हो। यो नतिजासँगै शीर्ष स्थानको चितवनले तीन खेलबाट सात अंक पुर्‍याएको छ, जुन दोस्रो स्थानमा रहेको साबिक विजेता ललितपुर सिटी एफसीको भन्दा दुई अंक बढी हो। झापा भने समान खेलबाट तीन अंक पुर्‍याएको छ। झापा एक स्थान सुधार गर्दै चौथो स्थानमा उक्लिन सफल भएको छ। झापाले यसअघि बुटवल लुम्बिनी एफसी र काठमाडौं रेजर्ससँग गोलरहित बराबरी खेलेको थियो।&nbsp;

चितवनले झापासँग अंक बाँड्यो

काठमाडौं। श्री भगवती क्लब र च्यासल युथ क्लब बराबरीमा रोकिएका छन्।सहिद स्मारक ‘बी’ डिभिजन अन्तर्गत सातदोबाटोस्थित एन्फा कम्प्लेक्स मैदानमा आइतबार सम्पन्न खेलमा च्यासल र भगवती गोलरहित बराबरीमा रोकिएको हो। दुबै टोलीले केही अवसर सिर्जना गरे पनि गोलमा परिणत गर्न सकेनन्। जारी लिगमा भगवतीको यो दोस्रो बराबरी हो। दोस्रो स्थानमा रहेको भगवतीको पाँच खेलबाट १० अंक छ। शीर्ष स्थानको प्लानिङ ब्वाइजको भने १२ अंक छ। यद्यपि, प्लानिङले एक खेल कम खेलेको छ। च्यासल पाँच खेलबाट आठ अंकसहित चौथो स्थानमा यथावत् छ।

च्यासल र भगवतीले अंक बाँडे

काठमाडौं अन्नपूर्ण आरसीटीको नयाँ कार्यसमितिलाई आइतबार एक विशेष कार्यक्रमबीच पदभार हस्तान्तर गरिएको छ । निर्वतमान अध्यक्ष सुरेशकाजी शाक्यले नव निर्वाचित अध्यक्ष राजेश श्रेष्ठलाई पदभार हस्तान्तरण गरेको हो । नयाँ कार्यसमितिले शाक्यलाई क्लबको प्रमुख संरक्षक पनि घोषणा गरेको छ ।नयाँ कार्यसमितिमा कुमार राजभण्डारी, नरेन्द्रबहादुर श्रेष्ठ र रविन महर्जन उपाध्यक्ष, रजेन्द्रप्रसाद श्रेष्ठ सचिव, अशोक मानन्ध सह–सचिव तथा नरेश बैद्य कोषाध्यक्ष रहेका छन् । यस्तै सदस्यमा चंगेजलाल श्रेष्ठ, यज्ञरत्न तुलाधर, दिनेश श्रेष्ठ, अमूल्य मानन्धर, रामचन्द्र श्रेष्ठ, बुद्धरतन महर्जन र सन्तोष तुलाधर छन् ।यस्तै योगेशकुमार खड्गी पदेन सदस्य रहनेछन् । त्यही कार्यक्रमको अवसरमा क्लबको संग्राहलय स्थापनामा सहयोग पुर्‍याउने सबैलाई सम्मान पनि गरिएको थियो । विक्रम संवत् १९८९ मा स्थापित अन्नपूर्ण आरसीटी नेपाली फुटबलकै सबैभन्दा सफल क्लबका रूपमा रहेको छ ।&nbsp;

अन्नपूर्ण आरसीटीमा नयाँ कार्यसमितिलाई पदभार हस्तान्तरण

काठमाडौं, चैत २३ गते । नेपाल आर्मीकाद्वय होमलाल श्रेष्ठ र सुनसरी रोकाया ५५ किलोमिटर दूरीको त्रिशूली अल्ट्रा रेसमा शनिबार पहिलो भएका छन्। पुरुषमा होमलाल र महिलामा सुनसरी पहिलो भएका हुन्। नेपाल एडभेन्चर रनिङ महासंघद्वारा आयोजित अल्ट्रा रेसमा होमलालले निर्धारित दूरी ४ घण्टा ३३ मिनेट २२ सेकेन्डमा पूरा गरे। आर्मीकै गोपाल तामाङ ४ घण्टा ३५ मिनेट ५७ सेकेन्ड समयमा दोश्रो तथा सोलुखुम्बुका अर्जुन कुलुङ राई ४ घण्टा ४१ मिनेट ४० सेकेन्ड समयमा तेश्रो भए।&nbsp; आर्मीका तिलकबहादुर सुनवार चौथो, रुकुमका शक्तिराम रोक्का पाँचौं, त्रिशूलीका राजेश उपरकोटी छैटौं, एपीएफका राजेन्द्र तामाङ सातौं, आर्मीका जुनेश खड्का आठौं, नविल बैंकका शेर थारु नवौं र रुकुमका दुर्गाराज बुढा दसौं भए ।प्रदेश खेलकुद विकास परिषद्, बागमती प्रदेशको सहयोगमा भएको प्रतियोगिताको महिलामा सुनसरीले निर्धारित दूरी गर्न ५ घण्टा ५१ मिनेट समय खर्चिन्। ६ घण्टा १३ मिनेट २४ सेकेन्ड समय लगाएकी खोटाङकी निर्मला राई दोश्रो भइन्। तेश्रो स्थानकी नेपाल प्रहरीकी लाक्पा निमा शेर्पाले ७ घण्टा १४ मिनेट २० सेकेन्डमा दौड सकाइन्। पुरुष/महिला दुवैमा शीर्ष तीन स्थान हात पार्नेले क्रमशः १ लाख, ७५ हजार र ५० हजार नगद पुरस्कार हात पारे। चौथोले २० हजार, पाँचौंले १० हजार र छैटौंदेखि दसौं स्थानमा आउनेले जनही ३ हजार रुपैयाँ प्राप्त गरे ।विजेतालाई बागमती प्रदेशका मुख्य मन्त्री बहादुरसिंह लामा, प्रदेश खेलकुद विकास परिषद्, बागमती प्रदेशका सदस्य–सचिव दीपक लामा, विदुर नगरपालिकाका उप मेयर प्रभा बोगटी, राष्ट्रिय खेलकुद परिषद् (राखेप) का पूर्व कार्यकारी समितिका सदस्य एवं आयोजक नेपाल एडभेन्चर रनिङ महासंघका अध्यक्ष एकेन्द्रबहादुर कुँवर, राखेपका सदस्य जनकसिंह धामीलगायतले एक कार्यक्रमबीच पुरस्कृत गरे।&nbsp; यसअघि प्रतियोगिताको मुख्य मन्त्री लामाले नै उद्घाटन गरेका थिए। समापन कार्यक्रमलाई सम्बोधन गर्दै मुख्यमन्त्री लामाले अल्ट्रा रेसले कुनैपनि क्षेत्रको पर्यटकीय स्थलको प्रवद्र्धन र पहिचान गर्न मद्दत पुग्ने धारणा व्यक्त आगामी दिनमा पनि प्रतियोगितालाई बागमती प्रदेश सरकारको सहयोग निरन्तर रहने प्रतिबद्धता व्यक्त गरे। अध्यक्ष कुँवरले अल्ट्रा रेस आयोजनामा प्रत्यक्ष÷अप्रत्यक्ष रुपमा सहयोग गर्ने सम्पूर्णलाई धन्यवाद दिदै महासंघले खप्तडमा बृहत अल्ट्रा रेस आयोजनाका लागि तयारी अगाडि बढाइरहेको बताए। उनले त्रिशूली अल्ट्रा रेसलाई आगामी दिनमा पनि निरन्तरता दिदै अझ बृहत स्वरुपमा आयोजना गर्ने प्रतिबद्धता व्यक्त गरे। दौड नुवाकोटको बेलकोटगढीबाट सुरु भइ मलाकोट, शेराकोट, नुवाकोट दरबार, सूर्यगढी, बेत्रावती हुँदै नुवाकोटकै देवीघाट मन्दिरमा आएर टुंगिएको थियो।&nbsp; दौडमा ३ विदेशी खेलाडीसहित १ सय २५ खेलाडीको सहभागिता रहेको प्रतियोगिता संयोजक आयोजक महासंघका वरिष्ठ उपाध्यक्ष राजन खत्रीले जनाएका छन्।

Nepal Sports

MENU

FOOTBALL LEAGUE

FAVORITE CLUB

यु-१९ विश्वकप एसिया छनोट खेल्ने नेपाली टोली घोषणा

📰 Recent News